7 هدايا للعرسان الجداد.. محتاجنها ومش هيقولوا عليها لحد

Large

صحابك القريبين منك هيتجوزوا! ولسة بتفكري في هدية الفرح ومش عارفة هتجيبي إيه! هنقولك على هدايا ممكن يحتاجوها ومش هتكون موجودة في قائمة الهدايا المكتوبة، لإنهم ببساطة مش هيطلبوها.

لو فعلا عاوزة تفاجئيهم وعاوزة تبعدي عن هدايا الفرح المكتوبة في القائمة يبقى جيتي للمكان المناسب. معظم العرسان مشغولين في الفرح ومش مركزين في التفاصيل الصغيرة، واللي في الغالب مش بيفتكروها غير وقت ما يحتاجوها، هدايا الفرح اللي هنقولك عليها هدايا عملية وشخصية، واللي بالتأكيد هتكون هدية مثالية للعرسان.

1. دواسة باب الشقة: 

مفيش أجمل من إنك تلاقي دواسة باب الشقة بتقول أهلا وسهلا للضيوف قبل أصحاب البيت نفسهم ما يقولوها. والعرسان بيستمتعوا بشهر العسل، هتفضل الدواسة ترحب بكل ضيف جاي يقول مبروك.

 هدايا للعرسان الجداد

2. البراويز:

أكيد بعد الفرح هيكون في عدد كبير من الصور للعرسان، وبالتأكيد مش هيكونوا لحقوا يشتروا براويز لصور الفرح. براواز شيك لايق على ديكور وأثاث البيت هيكون عملي بالنسبة لهم وأكيد هيستعملوه في بيتهم الجديد.

3. الشموع: 

ساعديهم في رسم حالة الرومانسية في بيتهم الجديد. كتير من العرسان الجداد بينسوا يشتروا حاجات صغيرة زي الشموع، واللي تعتبر من أكتر الهدايا المفضلة بالنسبة للعرسان. باسكت من الشموع الملونة واللي ليها ريحة زي الفانيليا واللافندر هتكون من أكتر الهدايا المفضلة عندهم.

 هدايا للعرسان الجداد

4. أدوات المطبخ: 

بالرغم من إن العروسة بتركز جدا وهي بتشتري أدوات المطبخ، لكن لأنها كتيرة جدا أكيد في حاجات ممكن تسقط منها، ده طبعا الضغوط المادية. أدوات المطبخ من أكتر الهدايا المطلوبة ومع وجود كتير من الأشكال والألوان هيكون عندك فرصة الاختيار كبيرة.

إقرا أكتر: قائمة بالهدايا اللي بيحتاجها العرسان.. اختاري هدية صاحبتك منها

5. كتاب الطبخ: 

مع أدوات المطبخ أكيد العروسة محتاجة وصفة ولا اتنين علشان تستعمل هدية الفرح. كتاب الطبخ من أكتر الهدايا المفضلة عند العروسة، خصوصا لو الطبخ بالنسبة لها شبه الطيران كدا ما تعرفش عنه حاجة، الكتاب هيساعدها يكون عندها مهارات الطبخ.

 هدايا للعرسان الجداد

6. روب حمام:

ممكن تشتري روب للعرسان شبه بعض، وأكيد إنه استعماله هيكون بشكل يومي، سواء الشاور اللي قبل الشغل، أو الشاور اللي بعد يوم طويل برا البيت، خليهم يحسوا بالفخامة والراحة في نفس الوقت.

7. شنطة سفر لشهر العسل: 

شنطة السفر الصغيرة هدية فرح شيك هتفيدهم كتير في شهر العسل ولأي سفريات بعد كده مش محتاجين فيها شنط كبيرة. ممكن الشنطة كمان تكون فيها جيوب كتيرة يقدروا يحطوا فيها الأوراق الخاصة بيهم زي جواز السفر في رحلة الطيران.