٥ حاجات تخليك تغطي تكاليف الفرح

الفلوس هتكفي؟ آه، بتحصل!

Large

الكلام اللي كلنا بنخاف منه وبنقلق نناقشه هو الكلام في الفلوس. بس إحنا هنكلمك عن تكاليف الفرح وإزاي تغطيها كلها من غير ما تتجنن ولا يبقى عليك ديون تزعلك بعدين. اتحكم في المصاريف والميزانية بخطة مُحكمة في ٥ خطوات. 

قسمنالك كل حاجة على ٥ مراحل، استعد دلوقتي علشان تعرفهم. 

أول خطوة: إزاي تحوش؟

النية دايما موجودة إنك تحوش، بس الواقع بييجي بمفاجآت ومصاريف وتكاليف مش على البال ولا الخاطر. فدي الحاجات اللي تعملها عشان تعرف تحوش. 

١- من أول ما تقرر إنك بتحب وقبل حتى الخطوبة، ابدأ خد من مرتبك 20% كل شهر، ده هيكون كفاية مع الوقت. ولو قدرت تشيل من المرتب أكتر، ياريت. 

٢- افتح حساب جديد في البنك لفلوس الفرح دي، كل شهر حول عليه الجزء اللي خصصته من المرتب وحرفيا إنسى تماما إن عندك الحساب ده، كأنه مش موجود. 

٣- تابع مصاريفك اليومية، وهتلاقي فيها أكيد اللي تقدر تقلل منه زي الأكل برة والأكل اللي بيتطلب في الشغل والسينما أكتر من مرة في الشهر والشوبينج وشراء الحاجات الجديدة. 

تاني خطوة: توزيع المصاريف

أول ما تتفقوا على رقم تقريبي لتكاليف الفرح، امسكوا فيه ومتزودوش عليه على قد ما تقدروا. توزيع المصاريف صح، هو اللي هيخليكم توصلوا للمرحلة دي. ممكن الاقتراح اللي جاي ده يكون مناسب ليك وممكن توزع الفلوس بنفسك بالشكل اللي يرضيك. 

50% من المبلغ هيروح للمكان وتجهيزاته وتفاصيلها، 15% هيكون للشكل، يعني الفستان والبدلة والكوافير والميك آب والإكسسوارات، 10% كمان هيتخصصوا لفقرات الفرح زي الـ DJ والمزيكا وهكذا. مصور الفوتوغرافيا والفيديو هيكون ليهم 10% من المبلغ الكامل، آخر 15% هتتقسم بين المواصلات يومها 5%، والرسميات زي "كتب الكتاب" و"الإكليل" 5%، والطوارىء والمفاجآت اللي هتخصصلها 5% من الميزانية تحت مسمى (احتياطي).

تالت خطوة: اعمل لنفسك نظام

الخطوتين اللي فاتوا عملولك نظام معين، بس عشان تقدر تلتزم بيه يلزملك نظام تاني للمتابعة. وهنا هتحتاج تعمل لنفسك روتين تلتزم بيه من خلال أبليكيشن (ممكن تعمل حسبتك من هنا) أو ورقة وقلم تكتب فيهم كل جنيه بتصرفه يوميا سواء على أكل، مواصلات، شوبينج، قهوة، خروجات أو غيرها. دي الطريقة المثالية إنك تحسب مصاريفك عشان تقدر تلتزم بميزانية الفرح وقت الترتيبات.

احسب تكاليف الفرح من هنا

رابع خطوة: شارك واخترع

ده الوقت المناسب للاختراعات وللمشاركة، وللبحث والتدوير وإنك تطلب كل اللي محتاجه. 

١- اخترع:

مفيش كتاب بيقولك تعمل إيه ولا فيه قانون لحاجة، ممكن تخلق وتخترع حاجة من اللاشيء لو بس شاركتوا بعض وخرجتوا الفنان اللي جواكم.

٢- شارك:

أول سؤال محتاج تسأله "مين هيدفع إيه؟"، يمكن تلاقي حد من الأهل هيجيب فستان الفرح هدية، يمكن مفاجأة حلوة تشيل عنك مصاريف كتير، ويمكن تلاقي العروسة نفسها مستعدة تتنازل عن حاجات وبتقول مش مهم مكان كبير أو تورتة عملاقة أو بوفيه مبيخلصش. شاركوا الأفكار كلها سوا، اقسموا المصاريف عليكم وعيشوا في تبات ونبات.

٣- أطلب اللي محتاجه:

ممكن يكون الحل في إنك تستلف حاجة من حد مش عايزها أو تأجر حاجة للفرح. فكر في اللي ممكن يتعمل فيه كده، واسأل اللي حواليك عن اللي أنت محتاجه. 

٤- ابحث ودور كويس:

مش هتدور على مكان ولا فستان ولا تفاصيل الفرح، لأ هتدور وتسأل على الأماكن والمواعيد اللي بيكون فيها خصومات وعروض كبيرة على الحاجات دي.

خامس خطوة: هنعدي الحاجات دي

مقدرناش منقولكش إن فيه حاجات تقدر تعديها ومتعملهاش عادي، ودول مجرد أمثلة عن اللي ممكن تعديه ومتعملهوش، وتقلل معاك تكاليف الفرح.

١- الديكورات الزيادة في مكان الفرح، عدي أي حاجة زيادة هتكون مجرد منظر ومحدش هيستفيد منها. 

٢- تورتة الفرح العملاقة، ممكن تبقي دور واحد عادي جدا وتكون جميلة وكفاية. 

٣- موسم الجواز والأفراح لو عديته وحجزت في وقت مختلف، هتلاقي نفس الأماكن سعرها بقى أقل كتير. وساعات كمان الأماكن بتعملك خصم كل ما عدد المعازيم زاد. 

٤- إعمل نفسك مش مهتم قوي وعدي مرحلة الانبهار أول ما حد من متخصصين الأفراح يقدملك عرضه. ده فعليا ممكن يخليه يعملك سعر مختلف ومخصوص عشان يخليك توافق وتتفق معاه. 

الكلام اللي كلنا بنخاف منه وبنقلق نناقشه هو الكلام في الفلوس. بس إحنا هنكلمك عن تكاليف الفرح وإزاي تغطيها كلها من غير ما تتجنن ولا يبقى عليك ديون تزعلك بعدين. اتحكم في المصاريف والميزانية بخطة مُحكمة في ٥ خطوات. 

قسمنالك كل حاجة على ٥ مراحل، استعد دلوقتي علشان تعرفهم.