واجبات العروسة الجمالية والصحية من قبل الفرح بـ3 شهور لغاية أسبوع

Large

بداية من قبل الفرح بـ6 شهور بيبدأ العد التنازلي بالنسبة للعروسة، وخلال الفترة دي لازم تبدأ تهتم بالجزء الجمالي والصحي، خاصة إن الجزء ده مهم جدا، لأنه هيكون السبب في ظهورك بشكل مشرق وجذاب يوم الفرح، لكن في حالة إذا كان وقتك ضيق، فلازم البداية تكون قبل الفرح بـ 3 شهور، من خلال الخطوات والنقاط اللي هنعرضها عليكي.

 هنقولك على الروتين الخاص بيكي، كلها حاجات سهلة وبسيطة،ولو التزمتي بيها هتوصلي للنتيجة اللي انتي عاوزاها بمنتهى السهولة.

تعالي نبدأ: 

1. الفيتامينات: 

من أهم الأمور اللي هتساعدك بشكل سريع للحصول على بشرة نضرة الفيتامينات، وأقل فترة علشان تشعري بتأثيرها هي 3 أشهر، مش لازم تكون كبسولات، ممكن تدخلي في نظامك الغذائي اليومي الأطعمة اللي بتكون فيها فيتامين سي اللي بيعالج البشرة ويحافظ على الأظافر، وكمان داومي على تناول أطعمة الجمال زي الموز، اللوز، الفول السوداني والسبانخ، كلها أطعمة ملياة فيتامينات وهيكون ليها تأثير ملموس على البشرة والشعر.

2. الرياضة: 

المفروض إن الرياضة جزء لا يتجزأ من اللايف ستايل الخاص بيكي بشكل يومي، وعلى أقل تقدير بشكل أسبوعي.

علشان يظهر تأثير أي برنامج رياضي على جسمك لازم مش أقل من 3 شهور، هيبدأ الجسم يتجاوب مع البرنامج وتلاحظي الفرق بشكل واضح، وبالتالي لو في اعتبارك الخضوع لبرنامج رياضي، لازم يكون قبل فرحك بـ3 شهور، ولو مفيش جيم علشان وقتك ضيق، ممكن تمشي بشكل سريع لمدة نص ساعة يوميا.

شوفي أكتر: لبشرة متوهجة أفضل 8 أكلات داومي عليهم قبل الفرح بـ3 شهور

قبل الفرح بشهرين: 

3. الدايت:

بجانب الرياضية، لازم يكون في نظام غذائي تلتزمي به، والفترة دي في أطعمة لازم تتوقفي عن تناولها، أهمها الأطعمة اللي بتسبب انتفاخ زي منتجات الألبان، الكافيين زي الشيكولاتة، المشروبات الغازية وتحديدا زي بيبسي والكوكاكولا، القهوة والشاي، الأطعمة المصنعة، والسكريات، كتري من الأطعمة الصحية زي الفاكهة، الخضار، السلطة، والبروتين، دايما خلي آخر وجبة تكون الساعة 8، وفي حال إنك شعرتي بالجوع ممكن تاكلي علبة زبادي.

4. شرب المية: 

المية عنصر مهم جدا في جسم الإنسان، ومن الناحية الجمالية هي السبب الرئيسي في مرونة الجلد والشباب، وبالتالي لازم تحافظي على تناول 2 لتر ماء في اليوم كأقل جرعة يوميا، وإذا كنتي من الشخصيات اللي بتعرق كثير فلازم تناول 3 لتر من المية في اليوم. لكن إذا كنتي من الشخصيات اللي مش بتحب تشرب مية كتير، حطي في كوباية المية شرائح ليمون وعودين نعناع، هيغير مفهومك تماما.

5. الأطعمة الصحية: 

الحفاظ على تناول الطعام الصحي، زي الخضروات، طبق سلطة يومي والفاكهة، العشاء خفيف، وتناول 2 كوب من الشاي الأخضر صباحا ومساء.

قبل الفرح بأسبوع:

اللمسات الاخيرة تبدأ بالمواظبة على التخلص من الجلد الميت وتقشيره، وده هيكون من خلال استخدام منتج جيد للتخلص من الجلد الميت زي منتجات البحر الميت، وماسكات الشعر والبشرة والترطيب.