مش لازم تفلسوا عشان تعملوا فرح.. أفكار لأماكن أفراح بأقل ميزانية

Large

أماكن الأفراح بتاخد الجزء الأكبر من ميزانية الفرح.. الحقيقة هي مش رخصية! بس ده مش معناه انكم تتراجعوا وتخافوا، لو عايزين تعملوا فرح شيك وحلو، في اختيارات كتير تناسب ميزانيتكم. خليكم كرييتف واخرجوا برا الصندوق، ممكن تعملوا فرح على البحر في المكان اللي بتحبوه، أو في الأماكن التاريخية الأثرية! متتكسفوش من إنكم تفاصلوا في الأسعار، ده عادي جدا، وحاولوا تختاروا معاد الفرح بعيد عن موسم الأفراح، لإن الأماكن بطبيعة الحال في الوقت ده بتكون غالية.

الاختصار في قايمة المعازيم ضروري، لإنه بيفرق فى تكلفة البوفيه، أهم حاجة خدوا وقتكم مفيش داعي تستعجلوا، اتأكدوا انكم شفتوا كل الأماكن اللي بتفكروا فيها، وفكروا دايما فى الحلول التانية.

أما من ناحيتنا جمعنالكم أفكار لكل الأماكن اللي ميزانية الفرح فيها معقولة:

البيت

طبعا أكتر اختيار مريح انكوا تعملوا الفرح فى البيت،  ومش مريح وبس ده كمان هيوفر ميزانية كبيرة خصوصا بعد الكورونا. ده حل ناس كتير بتفضله عشان تقلل تكاليف الفرح بتاعتها، وبعدين مفيش أحسن من فرح  صغير  بجو عائلي.

البحر

فرح على البحر! دايما مفتوح وببلاش. مفيش فيو أحلى من غروب الشمس البرتقانى الجميل والأمواج اللي بتتكسر على الرمل، هتبقي خلفية حلوة لصور الفرح. الأفراح على البحر بتحتاج مجهود أقل في كل حاجة زي الميكب والبس والديكور، وطبعا ميزانية فرح أقل وسيبوا الباقي على المناظر الطبيعية هي هتقوم بمهمتها.

البارك أو الجنينة

فكرتها زي البحر بالظبط، البارك مفتوح لكل الناس وبيوفرلكم مناظر طبيعية حلوه، زى الورد اللى بيكلف كتير فى قاعات الأفراح وهتاخدوه هنا ببلاش، لإنه موجود حواليك من الأساس، الإضاءة الطبيعية هتخلى صور الفرح أحلى بكتير.

إقرا أكتر: إزاي تختار مكان الفرح؟

المركب

الفكرة مش خيالية، لكن يمكن مفكرتوش فيها بشكل أساسي. لكن الحقيقة هو اختيار مناسب لأي ميزانية، وفي كتير من المراكب الكبيرة بتتأجر علشان يتعمل فيها أفراح، خصوصا في الجونة والعين السخنة وأماكن تانية كتيرة. ده هيكون فرح خيالي رومانسي في وسط البحر، يعني في اللامكان.

مكان تاريخي أثري