مش عارفة تختاري بوكيه الفرح في الشتا!.. يبقى الموضوع ده يهمك

Large

الفستان والجزمة من أهم التفاصيل عند أى عروسه قبل فرحها، وطبعا بوكيه ورد العروسة. في الأول يظهر إن اختيار البوكيه سهل، لكن الحقيقة هي تجربة صعبة ومرهقة، ودايما بتحتار ياترى تختار الورد يليق مع ستايل الفرح، ولا مع فستانها ومكياجها، ولا تختاره بالألوان إلى بتحبها وخلاص، وتحط ايديها على قلبها وتتمنى صور الفرح تطلع حلوه؟ الحقيقة ان ممكن بسهوله تختارى الورد إلى يدى شكل حلو وكمان يليق على كل حاجة في الفرح، هنساعدك تعملى بوكيه ورد حلو ويناسب فرحك خصوصا لو فرحك في الشتا. 

The Homeshop

أول وردة هنتكلم عنها هى الوردة البلدي الأبيض، ودى أول حاجه بتفكر فيها أى عروسة وهى بتختار بوكيه الفرح، وبتليق أوى مع فستان العروسة الأبيض التقليدي أو المودرن وبيديه لمسه بسيطة ورقيقة. الورد البلدي الأبيض تنفع تكون سنتر بيس أو ممكن نحط حواليها ورد أو أي نبات أخضر عشان يزود من جمال من البوكيه، ودى نصيحة مهمه أوى لأى فرح هيتعمل فى الشتا.

The Homeshop

زهرة الأوركيد، مع إنها زهرة نادرة وغالية، بس فعلا تستاهل. الأوركيد الأبيض أنيق وشيك جدا فى بوكيه الفرح، مناسب العرايس إلى بيحبو البساطة والرقة والجمال في نفس الوقت. كمان مناسب للعرايس المودرن إلى عايزين لمسة مميز وفريدة فى فرحهم، وبتعمل تجانس جميل مع عيدان النباتات المختلفة وبتخلى الشكل على بعضه مثالي لبوكيه الورد الشتوى. 

إقرا أكتر: خلى فرحك "fairy tale" واستفيد من سحر الشتا

May Flowers

أما لو عايزه بوكيه ورد مبهج وبيشع تفاؤل، ممكن تختارى زهرة الديزي أو الـ daisies، فلو بتفكري في بوكيه كبير هي أنسب زهرة له، خصوصا إن تقدري تحطيها مع الورد الأحمر والقرنفل، وده هيدكي فرصة مش بس إن تحافظي على الشكل والمظهر التقليدي، لا كمان بنية البوكيه نفسه.