للعروسة: افتكري ومتنسيش وأنتي بتجهزي للفرح

١٣ سبب يخليكي تفتكري الحاجات دي

Large

لما تبقي عروسة بتجهز نفسها وبتحضر للفرح وبتشتغل كل يوم، بيبقى صعب تلاقي وقت فاضي والأصعب إنك تخلي الأحداث أبطأ أو الأيام متجريش. وعشان كده بالظبط، قررنا نكتبلك شوية حاجات ونقولك افتكري ومتنسيش عشان نساعدك تآخدي نَفسِك وتهدّي السرعة، وتركزي في تفاصيل مهمة محتاجة تكون قدام عينِك وقت الترتيب. والأهم، إننا نساعدك تشوفي الحلو في كل اللي بيحصل ده. 

في اللي جاي، هنقولك على ١٣ حاجة مينفعش تنسيها في الدوشة.

١- الضحكة دي هي السبب:

افتحي موبايلك، قلبي في صورك لحد ما تلاقي أول صورة ليكي أنتي وخطيبك سوا وأول واحدة لما قال بحبك وعايزنا نرتبط ... شايفة الضحكة دي؟ أهي هي دي السبب الرئيسي اللي خلاه يقرر يلتزم ويدفع اللي وراه واللي قدامه، كل ده بس عشان يشوفك مبسوطة وبتضحكي معاه. ففي وسط زحمة التجهيز، افتكري ومتنسيش إنه بيحبك وبيحاول قد ما يقدر عشان يثبتلك كده. 

٢- راجعي التواريخ:

شوفي تواريخ صوركم سوا، ارجعي في السوشيال ميديا بتاعتك شوية، شوفتي فات قد إيه عليكم مع بعض؟ افتكري ومتنسيش إن ده معناه إن اللي بينكم حلو وكبير وقدر يصمد كتير، وقولي لنفسك إن أكيد مش بعد كل ده هتيجي دلوقتي وتزهقي أو تجري. 

٣- عندك كل الوقت اللي في الدنيا:

فرحك مش كل حكايتك، لا ده جزء منها، قطعة من البازل الكبيرة. عندك حياة ومش لازم إهتمامك بالفرح ينسيكي أنتي أصلًا بتحبي إيه. الفرح ليه معاد وهيتعمل فيه وزي ما بنقول عندنا "هي ليلة ... اعمليها صح" وبعد كده، هيبقى عندك كل الوقت اللي في الدنيا. افتكري ومتنسيش تبصي على الصورة الأكبر والمشهد من بعيد وتتخيلي اللي جاي. 

٤- الانبساط هو الأساس:

اليوم ده أساسه إنك تتبسطي. خلي ده إهتمامك الأكبر، بإنه الفرح يبقي شبهك في كل تفاصيله. وافتكري إنك دايمًا أحلى لو مرتاحة ومش حاسة إنك بتعملي حاجة مش حساها. 

تصوير حامد كامل

٥- التزمي برقم معين:

متنسيش تحددي ميزانيتك من أول يوم. لا، هو ده الحقيقة منطقي بس المشكلة إن عرايس كتير بتحدد الرقم وتلاقيها في الآخر بتدفع ضعفه أو أكتر عشان مبتعرفش تلتزم بالرقم اللي حددته مع كمية التفاصيل الكتير والاختيارات اللي تزغلل العين.