للعروسة والعريس قبل الفرح بأسبوع: الأجازة مش مستحيلة قبل الفرح

Large

الراحة قبل الفرح بأسبوع كلمة ملغية من قاموس العريس والعروسة، لكن الحقيقة إنكم تقدروا تاخدوا الراحة دي، بشوية ترتيبات ومساعدة من أصحابكم وأقاريبكم، وده مش معناه إنكم هتكونوا بعاد عن التحضيرات لكن الضغط هيقل عنكم، وحالة التوتر اللي انتوا فيها تقريبا ممكن تختفي.

الفكرة إيه هي الحاجات أو المهام اللي تقدروا تخلوا أشخاص تانية يعملوها، وإزاي ومين هم بالظبط؟، ده اللي هنقولكم عليه.. 

1- اطلبوا المساعدة: 

قبل الفرح بأسبوع كل حاجة بتكون محتاجة متابعة، ولازم اللي بيتابع يكون عارف التفاصيل بالظبط، وفي الحالة دي هتطلبوا المساعدة من أشخاص قريبين منكم وعايشين تفاصيل تحضيرات الفرح معاكم زي أختك، أخوكي، مامتك، باباكي، الأصحاب القريبين.

2- قائمة المهام: 

أكيد جهزتوا قائمة المهام اللي لازم تخلص قبل الفرح بأسبوع، راجعوا عليها مرة تانية واختاروا المهام اللي مش لازم تعملوها بنفسكم، زي الحاجات اللي معظمها محتاج تنظيم أو متابعة أخيرة قبل الفرح أو يوم الفرح، مثلا الاهتمام بالمعازيم، مراجعة المواعيد والمشتريات مع متخصصين الفرح، شيل ونقل الحاجات لبيتكم، حل أي مشكلة لو ظهرت فجأة، وآخر حاجة مهمه تواجد شخص طول الوقت معاكم في تحضيرات الفرح.

3- إزاي توزعوا المهام؟:

انتوا أكتر ناس تقدروا تعرفوا مين ممكن يعمل إيه، مثلا تقدري تخلي باباكي يكون موجود وقت استلام أي أثاث في بيتك، وأنت كعريس أكيد مش هتقدر تطلب من أختك تقف على إيد العمال، لكن تقدر تطلب ده من أخوك أو حد من قرايبك، انتأكتر ناس هتعرفوا توزعوا المهام على الناس اللي حواليكم.

اقرا اكتر: خناقات قبل الفرح : هنكمل ولا هنفركش!

4- اختاروا طريقة التواصل: 

التواصل اللفظي ممكن يوقع تفاصيل تكتشفوها يوم الفرح وتتحولوا لوحوش مفترسة، نأمن نفسنا من الأول، فيه فكرتين، الأولى تعملوا جروب على الواتس آب تتابعوا مع الناس اللي اختارتوهم من خلاله، تاني طريقة ممكن تستعملوا المنظم الذكي Trello موقع عامل زي النوت بوك المنظمة، بس هو نوت بوك خارقة شوية، يعني هتقدروامن خلاله توزعوا المهام على أشخاص معينه، وهتشوفوا هما وصلوا لإيه وناقص لهم قد إيه، وتتابعوا كل حاجة من غير تليفونات أو مناقشات ممكن تضيع أجازتكم.