للعروسة اليوم اللي قبل الفرح: دلعي نفسك وأنتخي على الآخر!

قبل 24 ساعة من الفرح العروسة المفروض تعمل إيه؟

Large

هتعملي إيه قبل الفرح بيوم.. هتجهزي نفسك إزاي؟ لازم تاخد راحة علشان تشحني شوية طاقة لليوم الكبير. أكيد جواكي مشاعر متضاربة.. متوترة؟ ده طبيعي، بس الأهم استمتعي واحتفظي بكل لحظة وبكل المشاعر الفترة دي. بلاش تشغلي نفسك بالتأكيد على كل المنظمين.. هنقولك إيه اللي المفروض تعمليه قبل الفرح بيوم علشان تكوني جاهزة لأهم يوم في حياتك.

تصوير رامي مزيكا

أكدي على متخصصين الفرح:

لو ما كونتيش أكدتي على متخصصين الفرح في آخر أسبوع قبل الفرح، لازم تعملي كده دلوقتي علشان تتأكدي إن مفيش أي مشاكل وكله ماشي تمام، خصوصا لو فيه حاجة معينة محتاجة تتغير أو تتظبط، في معظم الأوقات العريس والعروسة بيقسموا المهام اللي زي دي مع بعض، وده بيخفف من عليكي أكتر، أهم الناس اللي لازم تأكدي على مواعيدهم هم الكوافير والميك أب ارتيست.

جهزي الفستان والجزمة:

مش هنوصيكي، طبعا لازم تجهزي كل حاجة هتلبسيها في الفرح من أول الفستان، الجزمة، الملابس الداخلية، الإكسسوار والطرحة، ركزي في تفاصيل كل حاجة واتأكدي إن كله مكوي ومتلمع. 

تصوير حامد كامل

جهزي شنطة للطوارئ:

جهزي شنطة للطوارئ فيها بنس وتوك زيادة، إبرة وخيط، اسبرين، مناديل، أساسيات المكياج، فرشة ومعجون أسنان، أو أي حاجة تانية هتساعدك يوم الفرح، الشنطة دي ممكن تنقذك في حاجات عمرك ما تتخيليها!.

جهزي كل حاجة هتحتاجيها يوم الفرح:

لازم تجهزي كل حاجة هتحتاجيها من قبل الفرح بيوم، خصوصا لو هتجهزي في المكان نفسه، ممكن حتى تبدئي تحطي الحاجات في العربية علشان توفري على نفسك التعب واللخمة من الشيل مرة واحدة، وما تنسيش كمان تحضري حاجاتك الشخصية في شنطة سواريه صغيرة تبقى جمبك.

كلي وإشربي مايه كفاية:

ما تنسيش تاكلي أكل صحي وتشربي مايه كفاية طول اليوم، لو خرجتي ما تكليش حاجة أول مرة تجربيها، مش عايزين مشاكل هضمليلة الفرح!، ما تجازفيش وخليكي في الحاجات اللي تعرفيها كويس.

تصوير ريمون الماركيز

شوفي أكتر: تختاري ليلة حنة تقليدية ولا حاجات آخر شقاوة؟

إقفلي الانترنت والفيسبوك:

إفصلي نفسك من الانترنت ومواقع التواصل الإجتماعي تماما، مش لازم تقفلي كل أجهزتك وتليفوناتك علشان تريحي دماغك، ببساطة ما تشغليش نفسك بحاجات مش مهمة وابعدي عن أي سلبيات.

دلعي نفسك:

اليوم اللي قبل الفرح لازم تسترخي على قد ما تقدري، اعملي حمام سخن، ماسك للوش، قضي وقت مع عيلتك، اتغدي غدوة حلوة أو إتفرجي على فيلم كوميدي يضحكك.