قبل الفرح بـ6 شهور: تعمل إيه لو خناقات الأهل في ترتيب فرحك وسعت منك

الحل اللي يسيطر على المشكلة قبل ما تكبر

Large

كل ما ميعاد فرحك بيقرب، كل ما التوتر بيزيد ومعاه الحماس، ومعاهم بيزيد ضغط الأهل، سواء باباك، مامتك أو حماك وحماتك. الخناقات اللي من النوع ده بتحصل لأسباب كتير، منها الصغير ومنها الكبير، بس أهم وأكتر سبب منتشر باختلاف العائلات هو "الحب". الأهل غالبا متحمسين وفرحانين بجوازك يمكن أكتر منك، فحبهم مخليهم عايزين يساعدوا ويتدخلوا في كل التفاصيل بس مش بهدف التحكم. 

عايزين يظهرولك الاهتمام دايما لكن مش مقصود بيه ضغط، عايزين يبقالهم دور في كل وأي حاجة، علشان يفكروك ويفكروا نفسهم قبلك إنك لسه ابنهم أو إنك لسه بنتهم الصغيرة، اللي محتاجالهم ومش هتستغنى عنهم أبدا حتى بعد الجواز. وبأمانة، ده دور الأهل الرئيسي، تعبيرهم عنه بس هو اللي بيكون غلط في دوشة الترتيب للفرح وافتكر دايما إن الهدف مش الضغط. وبرغم كل ده، أكيد تدخلهم وخناقاتهم برضه هتيجي على أعصابك كعريس أو كعروسة وممكن تخرجك عن شعورك. هنا ييجي دور الخطوات اللي جاية، واللي هتساعدك تسيطر على أي مشكلة قبل ما تكبر وتعرف إزاي تتعامل مع الأهل وضغطهم قبل الفرح. 

باختصار جدا، هي دي الحاجات اللي المفروض تعملها معاهم. 

١- أول ما تبدأ تحس بزيادة الضغط، اهرب فورا. قبل ما تعرف إزاي تتعامل مع الموقف، محتاج الأول راحة وكام يوم تفصل فيه من ترتيبات الفرح. قضي وقت أكتر لوحدك بعيد عن الخناق ووقت تاني مع أصحابك. 

٢- رتب خروجة عائلية، تكون فيها أنت وعريسك أو عروستك، باباك، مامتك، حماك وحماتك. خلي هدف الخروجة دي هم، إنهم يتبسطوا ويغيروا جو، من الآخر دلعوهم شوية. كلمتين حلوين كده يعرفوهم قد إيه أنتم الاتنين بتحبوهم ومقدرين تعبهم معاكم، اشكرهم بشكل واضح على كل اللي بيعملوه وسيبلهم فرصة يتكلموا هم عن ذكرياتهم وأيامهم الحلوة، قربهم من بعض بالحكايات. الليلة دي هتكون ناجحة وتعمل مفعولها بشرط واحد، إنها تكون من غير كلام عن الفرح ولا الجواز ولا الترتيبات، تكون ليلة اجتماعية عائلية من غير ولا خناق ولا مناقشات. 

تصوير ريمون الماركيز

٣- بعد الخروجة، اقعد مع عروستك أو عريسك وقرروا سوا إيه الحاجات اللي تقدروا تغطوا تكاليفها سوا من غير ما حد من الأهل هو اللي يدفع تمنها. وإيه تفاصيل الفرح اللي أنتم الاتنين مستعدين تتنازلوا عنها في مقابل راحة البال. الهدف من ده كله إن أهاليكم يفقدوا إحساس "ماكينة صرف الفلوس ATM" اللي عندهم، ويحسوا إن أهميتهم ليكم مش بس باللي هيدفعوه لأن وجودهم كفاية. 

٤- عيد ترتيب المهام وتوزيعها، خلي أهاليكم دايما مشاركين وليهم دور ولو بسيط، ده هيحصل بإنك توزع عليهم المهام والمسؤوليات. اشغلهم عن الخناق والحوارات بالترتيبات الفعلية. 

٥- خليك واضح وصريح، قول رأيك واقبل أو ارفض اللي الأهل ممكن يقولوه، لكن سيب دايما مساحة إنهم يعبروا عن رأيهم ويقترحوا حاجات قبل ما تقرر. وسيبهم ينفذوا بنفسهم حاجة، حتى لو مش مقتنع قوي بيها، مش هتلزق يعني، بس هتفرق معاهم فرق السما من الأرض. 

٦- لو الوضع تفاقم، وكبر وفي لحظة وسعت منك، اطلب المساعدة على طول. خلي حد غيرك يتدخل ويتكلم بلسانك، بس يكون حد كلمته مسموعة، يعني خال أو خالة، عم أو عمة، صديق قديم للعيلة، هو هيقدر يقنعهم ويوصل وجهة نظرك من غير زعل. 

٧- اقطع عليهم طريق الافتراضات، ما تسيبش حد من الطرفين يفتكر حاجة أو يفترض ولا أنت كمان. لو عندك سؤال أو نقطة مش واضحة أو مضايقاك، أتكلم معاهم بصراحة وخلص الموضوع كله في قاعدة. اسأل "هو حضرتك كنت تقصد إيه بكذا؟" أو "امبارح ما فهمتش قصد حضرتك إيه في الموضوع الفلاني؟" لو هم حسوا إنك واضح معاهم ورأيهم يهمك وعايز تسمعلهم، هيعملوا بالظبط اللي أنت عايزه.