قائمة لأفضل أغاني التسعينات اللي هتولع الفرح

Large

فكرت قبل كدة إنك تحط في لستة أغاني الفرح أغاني التسعينات! سألت نفسك مرة إيه  نوع أو شكل المزيكا اللي تخلي حد يقوم من مكانه علشان يرقص؟، في أغاني معينة مجرد ما تشتغل هتلاقي المكان كله ولع من الرقص، المفاجأة الحقيقية إن أغاني التسعينات رجعت موضه تاني في مزيكا الأفراح لإنها بترجعنا لأيام وذكريات جميلة محدش فينا ممكن ينساها، سواء للي كان شاب أو لسة طفل وقت ما طلعت الأغاني دي.

كتير من أغاني الفترة دي هتفضل خالدة مهما كانت الأذواق ومهما شكل المزيكا اتغير. هنقترح عليكم اسماء لأغاني اتعملت في التسعينات هتشعلل الدانس فلور!

"كاجولوه" محمد هنيدي

 كاجولوه هتشتغل من هنا وهتلاقوا القاعة كلها بتقول "أووه.. أووه" في نفس واحد من هنا! مفيش حد فينا ما اتفرجش على فيلم "صعيدي في الجامعة الأمريكية"، الفيلم ده اتعمل سنة 1998، وهو اللي خلق جيل جديد للسينما. وده يعني إن مفيش حد مش هيندمج مع الأغنية دي مهما كان.

"عيني" حميد الشاعري وعشام عباس

الأغنية دي طلعت سنة 1997 في ألبوم من نفس الإسم لحميد الشاعري، شارك هشام عباس في غناء الأغنية واتعملت فيديو كليب، الغريب إن اللي كانت طالعة موديل في الأغنية وقتها هي النجمة نيكول سابا. أول ما الأغنية دي بتشتغل في أي فرح الكل يقوم يرقص الرقصة اللي كان بيرقصها هشام وحميد في الكليبب. أروش أغنية وفيديو إتصور فيكي يا مصر! 

"شوقنا" عمرة دياب

الحقيقة إن الأغنية دي طلعت ديسمبر 1989 بالتحديد وبرضه كان ألبوم اسمه "شوقنا"، لكننا هنعتبرها من أغاني التسعينات، مفيش فرح بيعدي من غير ما بنرقص ونغني مع عمرو دياب، لكن على "شوقنا" أكيد الرقص هيكون له طعم تاني. 

"كامننا" محمد فؤاد ومحمد هنيدي

أغنية "كامننا" اتقدمت في فيلم "إسماعلية رايح جاي" سنة 1997، الفيلم قلب موازين السينما المصرية، خاصة أنه حقق في الفترة دي أعلى الإيرادات، ورجع الجمهور الشباب لمقاعد السينما من تاني. أغنية "كامننا" اتقدمت في الفيلم ونزلت في ألبوم من إنتاج نصر محروس، وكان إسم الألبوم "حيران" وزي ما الفيلم حقق إيرادات ساحقة، الألبوم حقق مبيعات وقتها جبارة.

"حكيم"

الأسطورة حكيم اللي رجع الناس تسمع الأغاني الشعبية مرة تانية، كانت أول أغنية قلبت الدنيا لحكيم سنة 1991، وهي أغنية "نظرة"، وبعدها حكيم أصبح ماركة مسجلة في الأفراح، أغانيه هتفضل موجودة ومهما قدمت هتقوم أي فرح برضه، من أكتر أغانيه اللي هتهيص الدنيا "الواد ده حلو"، "افرض مثلا"، "نار"، "ولا واحد ولا مية".