فرح إيلي صعب جونيور الأشهر في 2019 ... ولا في الأحلام!

سنة ترتيبات.. 4 تصميمات وفرح على 3 ليالي

Large

بتقول قواعد الحكايات إن كل حكاية حلوة ليها بداية ووسط ونهاية، ولما تكون حكاية فرح ولا في الأحلام، فرح أسطوري استمر الاحتفال بيه 3 أيام واستحق عن جدارة لقب "فرح السنة" في لبنان، يبقى الحكاية أكيد كاملة ومثالية. التحضير للفرح استمر سنة، كان فيه 4 تصميمات مختلفة للعروسة منهم فستانين فرح، جمبسوت وفستان سواريه وكلهم مطرزين بأكتر من مليون قطعة ترتر وكريستال. ده غير الألعاب النارية في نص الليل وحلم عمره 10 سنين بقى حقيقة. كل ده كان في فرح إيلي جونيور -الابن الأكبر للمصمم اللبناني العالمي إيلي صعب- وكريستينا مراد والمعروف عالميا بفرح #Eliekika.

لكن إيه اللي كان في الفرح؟ وإيه اللي سرق أنظار، اهتمام وأنفاس الكل، سواء كانوا من الحضور في الحفلة أو على السوشيال ميديا؟

الحكاية كلها بدأت هنا

 من عشر سنين، العروسة "كريستينا مراد" قابلت لأول مرة مصمم الأزياء العالمي إيلي صعب وكان كلامها ليه نقلا عن حوارها مع Brides.com  "قابلت حمايا من عشر سنين، وقولتله يومها إني أتمنى إنه يصمملي فستان فرحي" بعدها وفي يوم من الأيام من غير ترتيب قبل حوالي سنة، اتعرفت كريستينا على عريسها من خلال أخوه سيليو صعب اللي كان صديق ليها من فترة في الوقت ده.

استمر التعارف بينهم 3 شهور وده قبل ما يطلب إيلي جونيور من كريستينا الجواز وتوافق. لكن العروسة كانت شايفة إن الترتيب لفرح زي ده هيآخد وقت طويل، وده اللي حصل فعلا. تجهيزات الفرح استمرت سنة كاملة لحد يوم 19 يوليو 2019 بعد خطوبة استمرت 13 شهر بالظبط.

اللي حصل بالتفصيل

بدأت الاحتفالات بعشاء وحفل تمهيدي قبل الفرح في لو بلاتوه في باكيش، لبنان. ظهرت العروسة بأول تصميم من تصميمات حماها، واللي كان جمبسوت أبيض بحزام دهبي وعباية شفافة واكسسوار دهبي للشعر. ظهرت كلودين صعب -وهي زوجة إيلي صعب وأم العريس- بفستان كمان من تصميم إيلي واللي كان أزرق ملكي طويل وعليه عباية شفافة.

وفي يوم الفرح التاني، اختار العرسان كنيسة بكركي لاتمام مراسم الزواج الرسمية لتاريخها ومكانتها في الديانة المسيحية في لبنان. حضر المراسم أكتر من 1000 ضيف، وده كان الظهور الأول للعروسة بأول فستان فرح ليها.

شوف  أكتر: فرح أبيض في أبيض

الفستان الأول للفرح واللي من تصميم إيلي صعب كان فستان أبيض منفوش من غير أكمام مطرز بـ 500.000 قطعة ترتر وبديل طوله 14 قدم.

"العالم كله بيتفرج لأنها تستاهل" ده اللي كتبه ميك آب آرتست العروسة بسام فتوح مع أول طلة ليها على صفحته بمواقع التواصل الاجتماعي. اختار بسام للعروسة اللي يخلي بشرتها صافية ومنورة مع ألوان سموكي للعين ولون طبيعي للشفايف واستخدم في كل ده منتجاته اللي بتحمل نفس اسمه. 

تصفيف وستايل شعر العروسة كان شغل المصمم وسيم مرقس والفرح كله كان من تصوير برازار وكارل حلال. جهزت ونظمت نيمان عازي الكنيسة للفرح بنباتات خضرا و365 شمعة، بتمثل كل شمعة منهم يوم من أيام السنة.

بعد الاحتفال الأول، اتحرك العريس، العروسة والمعازيم لحفلة الفرح الرئيسية اللي كانت في نادي بلدة فقرا، المدينة الأصلية لعيلة صعب. وفي الحفلة الجديدة، ظهرت كريستينا بفستان الفرح التاني واللي كان فستان شامبين منفوش ومطرز بـ 650.000 قطعة ترتر و150.000 قطعة كريستال من شوارفسكي ده غير 50.000 قطعة ترتر للطرحة واكسسوار الشعر.

كلودين صعب لبست للفرح فستان أزرق لبني أوف شولدر جديد من تصميم زوجها ومعاه حزام دهبي.