عروسة جديدة..إطلالات لفطار رمضان لازم تجربيها!

Large

لو إنتي عروسة جديدة، وده أول رمضان يمر عليكي لازم تعرفي إن بقى عندك التزامات مختلفة! زى تحضير الأكل والضيوف إلى هتعزميهم على الفطار لأول مرة، وطبعاً حضور أي تجمعات تتعزمى فيها مع شريك حياتك، شهر مليان بالمناسبات الاجتماعية والأكل الجميل، وعشان كل ست بتحب تهتم بشكلها ولبسها خصوصاً لو هتقابل ناس كتير من العيله أو الأصحاب، فالسؤال الى هيشغلها دايماً هو ياترى إيه إطلالة رمضان اللي لازم تظهري بيها؟

فيه حاجات مهمة لازم تحطيها فى الاعتبار قبل ما تختارى إطلالة رمضان سواء للفطار أو السحور، أولاً ما يكونش ضيق جدًا، وعادة معظم الناس بيتجنبو اللبس الضيق لسببين واحد منهم الاحتشام والالتزام الدينى، والتانى لأنه مش هيكون مريح لما المعده تتنفخ بعد أكل الفتة والكنافة اللذيذة.

وانتى بتختارى لبس رمضان، مهم كمان يكون فيه جزء مطبوع، ودى حاجة كل الناس بتحبها خصوصا في التجمعات، سواء كانت الطباعة ملونة أو أنيقة أو مزخرفة، بتدى شكل جميل وبتناسب الأجواء، ولو مش هتعملى كده في رمضان، فالأحسن متعمليهوش فى أى وقت تانى لأن ده الموسم بتاعه، المطبوعات ممكن تكون رسمة أورينتال مرتبطة بالموسم أو مطبوعات عشوائية ماشية مع الألوان التانية، لكن المهم تستمتعى.