بعد 3 شهور: الروتين اليومي قبل الجواز حمادة وبعد الجواز حمادة تاني خالص!

إزاي ترتب روتين يومك بعد 3 شهور جواز؟!

Large

3 شهور بعد الجواز عدوا في لمح البصر، كإنكم كنتوا لسة بتجهزوا وبتلبسوا فستان وبدلة الفرح إمبارح! بعد فترة شهر العسل وهوجة العزومات بيجي الوقت اللي هتبدأوا تتعودوا فيه على الحياه مع بعض وتستقروا على روتين يومي بعد الجواز، الحياه اليومية شكلها أكيد بيختلف تماما عن اللي كنتم متعودين عليه قبل كده، أكيد في الأول هتواجهوا صعوبات كتيرة علشان تتعودوا على الفكرة وتطبيقها، لكن شوية بشوية انتم الإتنين هتفهموا المعنى الحقيقي للمشاركة.

سواء الواحد بيبقى متعود يعيش لوحده أو مع شريك، التغيير للوضع التاني بيبقى دايما صعب ومحتاج وقت علشان نتعود ونتعايش معاه، الحقيقة هي إن الحياه في العلاقات بتختلف تماما عن إنكم تعيشوا في نفس البيت مع بعض، المهم تفهموا الفرق ما بينهم علشان تقدروا تنتقلوا لمراحل تانية من المسؤولية والالتزام، ومن المراحل دي هي إزاي تقدروا تظبطوا روتين يومكم على الحياه الزوجية؟

1. التواصل:

أهم حاجة تتكلموا عن تفاصيل الروتين اليومي لكل واحد فيكم وناقشوا إيه هي توقعاتكم من بعض، ما تنسوش إن دلوقتي إنتوا بتشاركوا حياتكم وده معناه إن لازم تتناقشوا في ازاي هتقدروا تظبطوا وقتكم بأفضل طريقة تتناسب مع جدولكم اليومي، مشاكل وخناقات كتير بتحصل في الجواز لعدم أو قلة التواصل ما بين الاتنين، تفادوا معظم المشاكل دي وإسمعوا وإتكلموا مع بعض في كل كبيرة وصغيرة.

2. كيفوا نفسكم على بعض:

الحياه الزوجية طبيعي يبقى فيها تنازلات ومجهود من كل واحد علشان يأقلم نفسه على حياة التاني، لازم إنتوا الإتنين تبقوا مستعدين تعملوا ده علشان تقدروا تحافظوا على علاقة صحية وسوية ما بينكم، لإن لو واحد بس فيكم هو اللي دايما بيتنازل وبيأقلم نفسه على التاني علشان ينجح العلاقة، بعد فترة هيحصل مشاكل، هي في الآخر مشاركة ومش حياة عزوبية، لازم تتقابلوا في النص أو قريب منه وما تخلوش شريك حياتكم يبذل كل المجهود لوحده.

تصوير محمد عاطف

3. شغل البيت:

من غير كلام روتين يومكم بعد الجواز هيتغير شوية مع شغل البيت، وإحنا في بيوت أهالينا محدش بيفكر أوي في شغل البيت، وعمرنا ما كنا بنفكر نحطه في جدولنا اليومي، قسموا الشغل ما بينكم وحاولوا تخلصوا يا قبل أو بعد ما ترجعوا من الشغل، الطبيعي إن اللي بيشتغل ساعات أقل هيساهم في شغل البيت أكتر، ساعدوا بعض واتفقوا على نظام يناسبكم انتم الإتنين. 

4. ما تتخلوش عن إهتمامتكم الشخصية:

مش المفروض ولا صحي إن حياتنا الزوجية تبقى مختصرة بس على إننا نروح الشغل، نرجع البيت نطبخ ونغسل، ولو كنا محظوظين أوي ممكن نلاقي شوية وقت نقعد فيهم مع بعض!.مما لا شك فيه إن كلنا عندنا هوايات وإهتمامات شخصية، وإن الجواز مش معناه أبدا إننا ننسى أو نتجاهل إحنا بنحب نعمل إيه، اعتمادنا على شريك حياتنا مش معناه إننا نفقد أستقلاليتنا أو إعتمادنا على نفسنا، لازم تلاقوا وقت لنفسكم.

مركز UPLIFT16

5. إعملوا حسابكم على تغيرات في الحياة الإجتماعية:

إعملوا حسابكم إن حياتكم الإجتماعية إحتمال تخس شوية، هتلاقوا نفسكوا مش قادرين تروحوا كل الخروجات مع أصحابكم علشان الوقت ضيق، ما بين الشغل والحاجات اللي لازم تعملوها في البيت والوقت اللي عايزين تقضوه مع بعض، والحياه العائلية هتاخد شكل مختلف وأكبر من العادي، العزومات والمناسبات هتكتر، علشان دلوقتي العيلتين بقوا عيلة واحدة.