النهارده فرحي يا جدعان!

تعملوا إيه يوم الفرح الصبح؟ روقوا.. اجهزوا

Large

كتبت/ آمنة مجدي

صحصحوا كده المنبه بيرن، النهارده فرحكم، الليلة دي العرض النهائي، مفيش خلاص ترتيبات وتجهيزات مرهقة تاني، علشان جه أخيرا وقت التنفيذ!. أكيد انتم الاتنين قضيتوا ساعات ملهاش آخر بترتبوا مع متخصصين الفرح، بتختاروا ما بين درجات الألوان المختلفة، بتروحوا للترزي من بروفة لبروفة، بتجربوا أكلات مختلفة علشان تختاروا المنيو، بتدوقوا أصناف كتير من التورت عند الحلواني، بتجروا من محل عَفش للتاني علشان تفرشوا الشقة على مزاجكم، وحاجات تانية كتير لحد اللحظة دي، يوم فرحكم الصبح!. 

كلها كام ساعة وتبقوا عريس وعروسة، خدوا لحظة بسيطة وانسوا كل التجهيزات،  وافتكروا إن كل ده مش علشان الفرح ولا الفستان والبدلة، كل التعب ده علشان انتم الاتنين توصلوا لخط البداية وتبقوا مع بعض كيان وفريق واحد محدش يقدر يفرقه.

تصوير ريمون الماركيز

النهارده مفيش حاجات كتير تتعمل غير أنكم تجهزوا لليلة الكبيرة، وتفرحوا مع بعض ومع حبايبكم من قلبكم، دلوقتي الحماس والتوتر أكيد مش سايبنكم في حالكم، حاولوا برضه تركزوا علشان ما تنسوش تعملوا شوية حاجات بسيطة بس مهمة. 

اصحوا في المعاد:

المنبه بيرن يعني تقوموا من السرير في معادكم وما ترجعوش تناموا تاني، النهارده مش يوم شغل عادي، يعني مفيش كسل!، المفروض تكونوا نمتوا كويس الليلة اللي قبلها وصاحين ومفوقين تماما دلوقتي.

تصوير إيهاب زكريا

 

تأملوا :meditate

علشان تخلقوا مود مريح لليوم، ابدأوه بفقرة قصيرة من التأمل أو اليوجا، لو مش بتتأملوا أو بتلعبوا يوجا بشكل مستمر، ربع ساعة هتكون كفاية جدا علشان تديكوا الطاقة الإيجابية اللي هتحتاجوها.

 

ما تنسوش تآكلوا:

سواء هتفطروا ولا هتلحقوا تتغدوا كمان، على حسب الفرح هيكون بدري ولا متأخر، ما تنسوش تآكلوا كويس علشان هتحتاجوا طاقة كفاية تقدروا تكملوا اليوم بيها من غير تعب أو إرهاق. 

اشربوا مايه كفاية:

ما تنسوش تشربوا مايه كفاية يوم الفرح الصبح، أكيد هتتحركوا كتير في الفرح، وهتفقدوا مايه من جسمكم بشكل كبير، أهم حاجة ما تشربوش كل كمية المايه اللي عايزين تشربوها قبل ما تنزلوا على طول وحاولوا تخلوها الصبح بدري. 

رتبوا مواعيد اليوم:

اعملوا جدول بمواعيد لكل حاجة هتعملوها في اليوم وانتوا بتجهزوا علشان الوقت ما يسرقكوش، وما تلحقوش تعملوا كل حاجة في معادها، فتلاقوا اليوم كله اتأخر وإتدربك عليكم، خلوا لنفسكم وقت كفاية تجهزوا فيه بمزاج.

تصوير ميلاد نصيف

اشحنوا الموبايلات:

ما تنسوش تشحنوا الموبيلات على الآخر قبل ما تنزلوا.

حضروا حاجاتكم الشخصية:

ما تنسوش تحضروا كل حاجاتكم الشخصية اللي هتحتاجوها معاكم في الفرح، ممكن تجهزوا شنطة طوارئ صغيرة، علشان لو فيه أي حاجة اتفكت أو وقعت من مكانها تقدروا تركبوها تاني، للعروسة ممكن تحضري شنطة ميك آب بسيطة فيها الأساسيات كلها علشان تظبطيه في أي وقت.