إيد لوحدها ما تصقفش! الجواز شركة ما بينكم والبيت مشروعكم

20 قاعدة هيساعدوكم تعملوا نظام البيت

Large

تخيلوا تصحوا كل يوم خايفين تدخلوا المطبخ من منظر المواعين اللي في الحوض، ولا من أكوام الغسيل اللي بتطاردكم في الحمام، مفيش نظام للبيت من بعد الجواز، بدل ما تدخلوا بيتكم آخر اليوم ويكون منظم ويفتح النفس على الراحة، للأسف بيكون العكس.

البيت الغير منظم مش حاجة مبهجة، غير الخناقات اللي هتظهر مرة واحدة في حياتكم مين عليه الدور يغسل المواعين، ولا يحضر الغدا، خناقة هتودي لخناقة تانية وتالتة لحد ماهتلاقوا نفسكم شايلين ومكشرين في وش بعض طول الوقت!.

تحديد نظام للبيت هيقلل تكرار سوء التفاهم والخناق اللي ممكن يحصل لو مأخدتوش بالكم، ساعدوا بعض واخلقوا روح إيجابية وبيئة صحية لبيتكم.

 الـ20 قاعدة هتساعدكم تعرفوا ازاي تعملوا نظام للبيت وتعيشوا في بيئة آمنة من أول يوم من جواز.

1- محدش أحسن من التاني:

أول وأهم قاعدة لازم تتحقق في بيتكم إن محدش أحسن من التاني، ما يفرقش مين بيشتغل أو ما بيشتغلش، ولا إيه شغلكم أو مؤهلاتكم، الدخل الشهري كام ولا قيمة حاجتكم الشخصية، لو قررتوا تتجوزا وتبقوا شركة واحدة مدى الحياة يبقى مينفعش أبدا تحسسوا اللي قدامكوا إنه أقل منكم، دايما حسسوا بعض بقيمتكم وإنكم فريق واحد.

2- إيد لوحدها ما تصقفش:

لازم إنتوا الإتنين تتشاركوا وتبذلوا مجهود علشان بيتكم وعلاقتكم تتطور وتنضج بشكل أقوى وأجمل، مينفعش حد واحد بس فيكم هو اللي يعمل كل حاجة حتى لو عدد ساعات شغله أقل من التاني، هي مشاركة بينكم أنتوا الإتنين! 

3- إظبطوا ساعتكم البيولوجية:  

إظبطوا ساعتكم البيولوجية على بعض علشان تقدروا تعملوا حاجات أكتر مع بعض خلال اليوم، إنتوا الاتنين مفحوتين في الشغل ومفيش وقت تقضوه مع بعض، إستغلوا اللحظات القليلة اللي بتتقابلوا فيها.

4- خصصوا وقت لبعض:

اختاروا يوم في الأسبوع تقضوا فيه وقت مع بعض سواء في البيت أو برا، مثلا ممكن تظبطوا أوقات تتفرجوا فيها على أفلام سوا بليل أو تخرجوا كل فترة علشان تشعللوا الحب والشقاوة مابينكم!

 

5- قسموا شغل البيت:

حددوا قواعد محددة لشغل البيت مع بعض وقسموا الحاجة على أساس عدد ساعات شغل كل واحد فيكم وقدرته، برضه قرروا هتتشاركوا إزاي، وبأيه وإمتى.

6- هاتوا اللي يساعدكم في شغل البيت:

لو حد فيكم أو إنتوا الأتنين مزنوقين في شغلكم بشكل كبير، الأفضل تجيبوا حد يساعد في تنظيف البيت، وعدد زيارات متخصصين النظافة هتتحدد على أساس ميزانيتكم وكمية الشغل اللي البيت هيحتاجها في العموم.

7- النظافة العامة:

إنتوا الإتنين هتبدأوا تتعودوا وتفهموا بعض أكتر من ناحية النظافة والنظام بعد ما تعيشوا سوا، قواعد النظافة العامة دي مهمة جدا علشان البيت يفضل نضيف ومترتب من غير ما تبذلوا مجهود كبير في تنضيفه كل يوم، القواعد ممكن تكون زي إنكم تشيلوا متعلقاتكم الشخصية بعد ما تغيروا هدومكم، تغسلوا الأطباق اللي بتستخدموها بعد الأكل. 

8- إعملوا حدود للخناقات:

قاعدة حياتية "مفيش إتنين متجوزين مش بيتخانقوا"!، لازم تفهموا إن حتى لو فيه خناق مينفعش تتعدوا خطوط معينة مهما حصل، الخطوط دي انتوا اللي بتحددوها مع بعض، وإعملوا قواعد للخناق، ما تستخدموش كلام خارج ولا جارح، ما تتجاهلوش بعض عن قصد، كل دي أمثلة اتبعوها علشان تتفادوا الخناقات اللي تقلب لمشاكل كبيرة.

9- إتخاذ القرارات:

حاجة مهمة تتفقوا عليها، وهي إزاي هتاخدوا قرارات تخص بيتكم وعلاقتكم مع بعض، حاجة زي دي هتزود الثقة وتحسسكم بأهمية المشاركة مابينكم. 

10- ميزانية البيت:

من الأول لازم تتفقوا على ميزانية واضحة تصرفوا بيها على البيت، تحديد مبلغ شهري لمصروف البيت وكل واحد فيكم هيشارك بكام.

11- الزيارات والعزومات:

لازم تتفقوا على الظروف اللي فيها تقدروا تعزموا الأقارب أو الصحاب، إحترموا خصوصية ومساحة الطرف التاني واتناقشوا أو على الأقل عرفوا بعض قبل ما تقرروا تستقبلوا حد في البيت.

12- سيبوا الشاشات شوية: 

طول ما انتوا الاتنين في البيت سيبوا الشاشات سواء لاب توب، تليفونات أو حتى التلفزيون، حاولوا يكون الوقت الفاضي ده مع بعض، ما تبدلوش العلاقة والتواصل اللي بينكم بـ "التكنولوجيا والسوشيال ميديا".

13- إتفقوا على عادات الأكل:

يا سلام بقى لو عندكم لايف ستايل واحد وبتاكلوا نفس أنواع الأكل ونظامكم  متشابه، هتسهلوا حاجات كتير على نفسكم، شجعوا بعض وبدأوا نظام صحي سوا، امنعوا دخول الأكل الغير صحي البيت.

14- خصوصية البيت:

الخصوصية في شؤون البيت حاجة من الحاجات اللي في الأغلب بتبقى نسبية من شخص للتاني، السؤال هو هل انتوا من الناس اللي بتفضل إن مفيش كلمة تطلع برا مهما كانت لمين؟، ولا اللي ممكن تتكلموا عادي عن حياتكم للناس القريبة بس؟!، هاتحتاجوا تتناقشوا في إزاي تحافظوا على خصوصية بيتكم وعلاقتكم والشكل اللي يناسب معايركم عن الخصوصية والحفاظ عليها. 

15- بلاش نقف لبعض على الواحدة:

الجواز له معاني كتير لكن أكيد مش ضمن المعاني إنه مسابقة بين الطرفين، ما تقفوش على الواحد وتعدوا الغلطات على بعض، حاولوا توازنوا الأمور، لإن مش كل حاجة بتمشي بالمسطرة، إدعموا بعض في الأوقات الصعبة اللي ممكن حد فيكم يمر بيها.

16- الحل دايما في التواصل:

الحل لأي سوء تفاهم أو أي مشكلة هو التواصل، اتكلموا علشان تحلوا مشاكلكم، بلاش كتم المشاعر، عبروا عنها قبل ما تبقى روحكوا في مناخيركم من بعض!. لازم عرفوا بعض إيه اللي بيريحكم وإيه لا.