إزاي تختار منظم فرحك؟

وتقابل صديقك المقرب الجديد

Large

لو أنتِ العروسة أو في طريقك إنك تبقي العروسة، يبقى أنتِ كمان في طريقك إنك تتعرفي على أقرب صديق ليكي الفترة اللي جاية، وهو منظم فرحك. المنظم هو شخص أنتِ بتقرري تعينيه عشان ببساطة يسمعك وتقوليله كل اللي في قلبك وتخيلك عن فرحك وينفذه. الشخص ده هو اللي هيبقى في ضهرك وبيدعمك من أول مكالمة تليفون لحد آخد لحظات العزوبية في حياتك. هو اللي هيحضر معاكي مناقشاتك مع خطيبك، مامتك، أهلك وأصحابك. ورغم كونه شخص جديد في حياتك، إلا إن هيبقاله كلمة مسموعة في أهم يوم، اللي هو فرحك. مش أقرب صديق هو اللي دايمًا بيعمل كده؟!

طالما قررتي يكون عندك منظم للفرح، يبقى لازم تكوني عارفة أولاً وظيفته بالظبط إيه. المنظم شخص مسؤول بشكل أساسي عن كل ما يتعلق بفرحك٬ هي شغلته إنه يوفر كل حاجة بأفضل سعر وينظمها ويتابع مسارها. إلى جانب إن أساس مهمته وجود قائمة كبيرة من أي حد بيقدم خدمات الفرح من أول الأماكن والمصورين لحد المطاعم اللي بتقدم الأكل والتورتة. 

بناء على ميزانيتك، تقدري تعيني المنظم بالشكل الأنسب ليكي، فممكن تتفقي معاه على العرض بكل تفاصيله وتغيري مقدمي الخدمة لحد ما الباكيدج تظبط معاكي. بس متنسيش إن على قد ما هتدفعي هتلاقي خدمة، يعني متتوقعيش من اللي هيكون بيتعامل مع أسماء صغيرة نفس الجودة زي اللي عنده مقدمي الخدمات من الأسماء الكبيرة والمشهورة والعكس صحيح. ومهما كانت تكلفة المنظم، فهو أكيد هيوفر عليكي فلوس كتير كان ممكن تدفعيها لو متعرفيش الثمن الحقيقي للحاجة وهيوفر طبعًا من وقتك ومجهودك والتوتر اللي مش محتاجة تحسي بيه بسبب ترتيب الفرح ولا عُمال القاعة وغيره. 

في ٧ خطوات هنقولك إزاي تختاري أحسن منظم فرح ليكي. 

١- مين الأسماء المقترحة؟

هتبدأى أونلاين بإنك تدوري على شغل وصور حفلات منظمين مختلفين وتختاري منهم اللي أسلوبه عجبك. بعدها هتبقى عندك قائمة بالأسماء المُقترحة. لو عندك مكان معين بتحبي شغله أو نفسك تعملي فيه فرحك، تقدري تسألي المكان نفسه عن المنظمين اللي بيتعامل معاهم، هيساعدوكي كتير في إنك تشوفي اختيارات أكتر. 

٢- اسألي عنهم:

بعد ما بقى معاكي الأسماء، ابدأي أسألي عرايس وعرسان اتعاملوا معاهم قبلك. لو ناس عارفاهم، كلميهم على طول ولو حتى مش عارفاهم تقدري تبعتيلهم رسايل على السوشيال ميديا وتشوفي هيقولوا إيه. ومتنسيش قبل كل ده، تشوفي التقييمات بتاعة كل شخص من اللي اخترتيهم على صفحاته المختلفة على السوشيال ميديا. الآراء دي هي أهم حاجة على أساسها هتختاري. 

٣- حضري أسئلتك:

الخطوة اللي فاتت أكيد هتكون خلتك تستبعدي بعض الأسماء ومن هنا، هتبدأي تحضري قائمة بالأسئلة اللي محتاجة تعرفي إجاباتها من المنظمين نفسهم (هتلاقي أهم الأسئلة عندنا هنا) وتتواصلي مع كل شخص لوحده سواء أونلاين أو في التليفون أو في مكتبه. 

٤- عارفة أنتي محتاجة إيه؟

كلامك مع كل منظم هيعرفك إذا كنتي مرتاحة في التعامل معاه أو لأ، وأكيد أنتِ محتاجة تكوني مرتاحة وعلى طبيعتك وقادرة تقولي كل اللي في دماغك من غير ما حد يُحكم عليكي أو يقلل أو يصغر من أحلامك في فرحك. ولو قدرتي تقولي للشخص ده كل أحلامك من أول يوم، يبقى أكيد هو الأنسب ليكي. إذا لقيتي المنظم بدأ يتفاعل مع كلامك ويزود أفكار عليه ويقولك على حلول ويقترح شكل التنفيذ يبقى استغلي حماسه ده فورًا واختاريه، لأنه هيعملك الشغل بقلب وهو عاجبه وحاسه. 

٥- اتكلمي في الفلوس:

من أول قاعدة، عرفي المنظم ميزانيتك للفرح شكلها إيه. والشخص الشاطر اللي عنده خبرة حقيقية وعلاقات في المجال ده وبيعرف يتفاوض ويفاصل هيقدر تقريبًا بأي رقم يعملك اللي أنتِ عايزاه. وحتى لو الميزانية قليلة جدًا، هيكون صريح معاكي وهيعرفك من الأول إن أقل رقم هو كذا عشان تقدري تقرري. 

٦- هيقدر ينقذ الموقف؟

أحسن منظم أفراح ممكن تلاقيه هو اللي يخفف عنك، هو اللي يسهل المهام عليكي وميعقدهاش، هو اللي هتحسي إنه في أي لحظة يقدر يتدخل وينقذ الموقف. 

٧- اكتبي العقد:

متنسيش تعملي عقد مكتوب، واللي هيكون مستعد يكتب معاكي عقد فيه تفاصيل الفلوس وطريقة الدفع والمواعيد يبقى أكيد شخص موثوق فيه وتقدري تعتمدي عليه في تنظيم فرحك. 

لو أنتِ العروسة أو في طريقك إنك تبقي العروسة، يبقى أنتِ كمان في طريقك إنك تتعرفي على أقرب صديق ليكي الفترة اللي جاية، وهو منظم فرحك. المنظم هو شخص أنتِ بتقرري تعينيه عشان ببساطة يسمعك وتقوليله كل اللي في قلبك وتخيلك عن فرحك وينفذه. الشخص ده هو اللي هيبقى في ضهرك وبيدعمك من أول مكالمة تليفون لحد آخد لحظات العزوبية في حياتك. هو اللي هيحضر معاكي مناقشاتك مع خطيبك، مامتك، أهلك وأصحابك. ورغم كونه شخص جديد في حياتك، إلا إن هيبقاله كلمة مسموعة في أهم يوم، اللي هو فرحك. مش أقرب صديق هو اللي دايمًا بيعمل كده؟!

طالما قررتي يكون عندك منظم للفرح، يبقى لازم تكوني عارفة أولاً وظيفته بالظبط إيه. المنظم شخص مسؤول بشكل أساسي عن كل ما يتعلق بفرحك٬ هي شغلته إنه يوفر كل حاجة بأفضل سعر وينظمها ويتابع مسارها. إلى جانب إن أساس مهمته وجود قائمة كبيرة من أي حد بيقدم خدمات الفرح من أول الأماكن والمصورين لحد المطاعم اللي بتقدم الأكل والتورتة. 

بناء على ميزانيتك، تقدري تعيني المنظم بالشكل الأنسب ليكي، فممكن تتفقي معاه على العرض بكل تفاصيله وتغيري مقدمي الخدمة لحد ما الباكيدج تظبط معاكي. بس متنسيش إن على قد ما هتدفعي هتلاقي خدمة، يعني متتوقعيش من اللي هيكون بيتعامل مع أسماء صغيرة نفس الجودة زي اللي عنده مقدمي الخدمات من الأسماء الكبيرة والمشهورة والعكس صحيح. ومهما كانت تكلفة المنظم، فهو أكيد هيوفر عليكي فلوس كتير كان ممكن تدفعيها لو متعرفيش الثمن الحقيقي للحاجة وهيوفر طبعًا من وقتك ومجهودك والتوتر اللي مش محتاجة تحسي بيه بسبب ترتيب الفرح ولا عُمال القاعة وغيره. 

في ٧ خطوات هنقولك إزاي تختاري أحسن منظم فرح ليكي. 

١- مين الأسماء المقترحة؟

هتبدأى أونلاين بإنك تدوري على شغل وصور حفلات منظمين مختلفين وتختاري منهم اللي أسلوبه عجبك. بعدها هتبقى عندك قائمة بالأسماء المُقترحة. لو عندك مكان معين بتحبي شغله أو نفسك تعملي فيه فرحك، تقدري تسألي المكان نفسه عن المنظمين اللي بيتعامل معاهم، هيساعدوكي كتير في إنك تشوفي اختيارات أكتر. 

٢- اسألي عنهم:

بعد ما بقى معاكي الأسماء، ابدأي أسألي عرايس وعرسان اتعاملوا معاهم قبلك. لو ناس عارفاهم، كلميهم على طول ولو حتى مش عارفاهم تقدري تبعتيلهم رسايل على السوشيال ميديا وتشوفي هيقولوا إيه. ومتنسيش قبل كل ده، تشوفي التقييمات بتاعة كل شخص من اللي اخترتيهم على صفحاته المختلفة على السوشيال ميديا. الآراء دي هي أهم حاجة على أساسها هتختاري. 

٣- حضري أسئلتك:

الخطوة اللي فاتت أكيد هتكون خلتك تستبعدي بعض الأسماء ومن هنا، هتبدأي تحضري قائمة بالأسئلة اللي محتاجة تعرفي إجاباتها من المنظمين نفسهم (هتلاقي أهم الأسئلة عندنا هنا) وتتواصلي مع كل شخص لوحده سواء أونلاين أو في التليفون أو في مكتبه. 

٤- عارفة أنتي محتاجة إيه؟

كلامك مع كل منظم هيعرفك إذا كنتي مرتاحة في التعامل معاه أو لأ، وأكيد أنتِ محتاجة تكوني مرتاحة وعلى طبيعتك وقادرة تقولي كل اللي في دماغك من غير ما حد يُحكم عليكي أو يقلل أو يصغر من أحلامك في فرحك. ولو قدرتي تقولي للشخص ده كل أحلامك من أول يوم، يبقى أكيد هو الأنسب ليكي. إذا لقيتي المنظم بدأ يتفاعل مع كلامك ويزود أفكار عليه ويقولك على حلول ويقترح شكل التنفيذ يبقى استغلي حماسه ده فورًا واختاريه، لأنه هيعملك الشغل بقلب وهو عاجبه وحاسه. 

٥- اتكلمي في الفلوس:

من أول قاعدة، عرفي المنظم ميزانيتك للفرح شكلها إيه. والشخص الشاطر اللي عنده خبرة حقيقية وعلاقات في المجال ده وبيعرف يتفاوض ويفاصل هيقدر تقريبًا بأي رقم يعملك اللي أنتِ عايزاه. وحتى لو الميزانية قليلة جدًا، هيكون صريح معاكي وهيعرفك من الأول إن أقل رقم هو كذا عشان تقدري تقرري. 

٦- هيقدر ينقذ الموقف؟

أحسن منظم أفراح ممكن تلاقيه هو اللي يخفف عنك، هو اللي يسهل المهام عليكي وميعقدهاش، هو اللي هتحسي إنه في أي لحظة يقدر يتدخل وينقذ الموقف. 

٧- اكتبي العقد:

متنسيش تعملي عقد مكتوب، واللي هيكون مستعد يكتب معاكي عقد فيه تفاصيل الفلوس وطريقة الدفع والمواعيد يبقى أكيد شخص موثوق فيه وتقدري تعتمدي عليه في تنظيم فرحك.