إزاي تختار مكان الفرح؟

المكان اللي هيفضل للأبد يفكرك بفرحك وأحلى لحظاته

Large

الأماكن ذاكرة حية، بتحتفظ باللحظات والأحداث والفرحة والحزن. الأماكن زي الناس، منها اللي ميتنسيش وفيه اللي مبينساش. وفي الفرح، المكان هو اللي بيكون الشاهد الأول على الحب، وعلى اللحظات الحلوة والوعود والخطوات الأولى اللي الاتنين بيآخدوها سوا لحياة جديدة. 

إختيار مكان فرحك مش قرار سهل ومحتاج شوية ترتيبات، وعلشان كده هنساعدك تعرف إزاي تختاره. 

اتفقوا سوا الأول:

قبل ما تبدأوا تدوروا على الأماكن، فيه شوية تفاصيل لازم تكونوا اتفقتوا عليها علشان مينفعش تختاروا قبل ما يكون المكان مناسب لشخصياتكم وشبهكم.

١- إيه نوعية الأماكن اللي بتحبوها وخصوصا في الأفراح؟ مكان مفتوح ولا قاعات مقفولة، على البحر ولا فرح تقليدي أو كلاسيك، على مركب أو ياخت ولا في مكان أثري وقديم، جنينة ومكان فيه زرع ولا ممكن مسرح أو متحف أو حتى مدرسة - لو المبنى قصر أو فيلا قديمة –، ولا يمكن فيه نوعية تانية من الأماكن بتلاقوا نفسكم فيها أكتر؟ كل دي اختيارات متاحة، ومبتنتهيش، بس بمجرد ما هتتكلموا سوا، هتقدروا تقرروا النوع الأنسب ليكم. 

مكان الفرح: فندق شيراتون شرم

٢- حددوا من الأول رقم لتكلفة مكان الفرح، ويكون مناسب للميزانية ومينفعش يزيد علشان تقدروا تدوروا وتختاروا وأنتم مرتاحين. 

٣- إيه المساحة المناسبة ليكم؟ عايزين مكان واسع وفيه مكان للرقص ولا مكان صغير تقدروا تتكلموا فيه وتسمعوا بعض أكتر؟ عدد المعازيم هيكون كبير ولا المقربين بس؟ اتفقوا على عدد تقريبي لأنه هيحدد شكل المكان اللي هتحجزوه.

٤- محتاجين تعرفوا إن المكان مش لازم يناديلكم من أول نظرة. اتفرجوا وزوروا أماكن كتير، ومتنسوش إن منظم الفرح هو اللي هيقدر يحول أي مكان تختاروه ويخليه زي ما بتحلموا. 

منظم الفرح اّيه فهمي

٥- حد فيكم عنده أفكار للفرح مينفعش يتنازل عنها؟ لو طول عمرك بتحلم بفرح على البحر، أو بتحلم تعزم أصحابك القريبين بس في مكان برا العاصمة وبعيد عن الدوشة، كل دي تفاصيل لازم تتفقوا عليها قبل أي حاجة تانية علشان تعرفوا إيه اللي ممكن تتنازلوا عنه أو تبدلوه وإيه اللي الفرح ميبقاش فرح من غيره.

٦- المعاد واليوم بيتحكم في 50% من إختيار مكان الفرح. عايز فرحك يكون في وقت معين، شتا أو صيف؟ مهم بالنسبالك يكون في تاريخ محدد؟ اختاروا سوا التاريخ أو الوقت بالتقريب اللي على أساسه تقدروا تحجزوا المكان المناسب. 

٧- لو حد فيكم عارف نفسه وعارف إنه بيحب يتحكم في كل حاجة ويرتب الدنيا من بدري، ابدؤوا دوروا من بدري، حجز المكان قبل الفرح بسنة أو ٨ شهور في الحالة دي هيكون مناسب جدا. ومتنسوش تتفقوا على عدد ساعات الفرح، عايزينه فرح طويل ولا ٤ أو ٥ ساعات كفاية؟

مكان الفرح: سميراميس إنتركونتيننتال القاهرة

إقرأ، اسمع واتفرج:

هنا فيه شوية حاجات محتاج تقرأ وتسمع عنها وتشوفها بنفسك.

١- اسمع آراء أكبر عدد من الناس وترشيحاتهم لأماكن جربوها، ممكن تلاقي عندهم اللي أنت بتدور عليه. 

٢- اسمع قلبك بيقولك إيه، وامشي ورا إحساسك بالأماكن اللي بتدخلها، ده اللي هيوصلك لمكان فرحك. 

٣- اقرأ كويس تعليمات وقوانين المكان قبل ما تقرر وتختار، لأن ممكن يكون فيها حاجات مش مناسبة ليك.

٤- اتأكد إنك قرأت آراء وتقييمات العرايس والعرسان اللي جربوا المكان قبلكم. ومهم تكون التعليقات جاية من أكتر من موقع مش واحد بس. 

٥- اتفرج على صور وفيديوهات كتير لأفراح في المكان اللي هتختاره. 

مكان الفرح: فندق لو ميريديان الهرم

اسأل الناس دي عن رأيها:

رغم إنه فرحك، لكن فيه ناس تانية لازم يكون ليها رأي معاك في اختيار المكان.

١- منظم الفرح: اتأكد معاه إن المكان اللي اختارته مناسب لشكل الفرح اللي في خيالك وإنه هيقدر ينفذلك فيه اللي أنت عايزه. 

٢- مصور الفرح: اسأل المصور عن رأيه في إضاءة المكان ورأيه في صور الأفراح في المكان ده. 

٣- مقدم البوفيه: اتأكد لو هتطلب خدمة بوفيه من برة المكان إنهم يقدروا يوصلوا الأكل ويقدموه بسهولة وبشكل كامل ومناسب في المكان ده.