إزاي تختار مصور الفيديو لفرحك؟

اللي هيحكي حكايات مفيش زيها

Large

الحكاية الحلوة هي اللي ما يتزهقش منها وتحب تحكيها وتسمعها كتير، والأحلى إنك تكون أنت بطلها. فرحك هو أكتر حكاية هتفضل تحكيها وتعيدها لنفسك، لأصحابك، لأولادك وأحفادك بعدين، وبما إن البني آدمين بطبعهم بيحكوا حكايات، وكل واحد بطريقته، هتحتاج تلاقي اللي بيحكي حكايات مفيش زيها، واللي يصور فرحك ويخليك تعيشه تاني وتالت كل ما تتفرج على فيديو الفرح مهما فات الوقت.

في مكان ما حالا، فيه عروسة وعريس بيتفرجوا مع أصحابهم على فيديوهات أفراح أونلاين وبيآخدوا نفس القرار اللي أنت أخدته بإنك تختار مصور فيديو فرحك. وعلشان كده، هنقولك شوية حاجات تساعد كل اللي بدأ يدور ويختار مصور الفيديو

دوّر شوية:

بعد ما أخدت القرار ده، هتبدأ تدور وغالبا هيكون التدوير أونلاين. وعلشان توصل لنتيجة كويسة، هتحتاج:

١- تدور في أقرب مصورين الفيديو ليك واللي بيتعاملوا مع المكان اللي حجزت فيه الفرح. 

٢- تتفرج على فيديوهات أفراح وأفلام عنها لناس مختلفة لحد ما تلاقي اللي يعجبك.

٣- تدور أونلاين على بروفايلات وتجميعات لشغل الفيديو للمصورين ومتنساش تقرأ وتشوف تعليقات الناس وتقييماتهم للصفحات.

٤- تسأل أصحابك وقرايبك ومنظم الفرح بتاعك وكمان مصور الفوتوغرافيا اللي اخترته عن مصورين الفيديو والمونتير اللي اتعاملوا معاهم قبل كده وليهم تجارب شخصية يقدروا يرشحوا على أساسها.

دور علي مصور فيديو فرحك من هنا 

اختار الأحسن وبس:

الأكيد إن كل واحد من المعازيم هيكون معاه كاميرا أو موبايل بيصور بيه صور وفيديوهات في فرحك، بس لو مش عايز تفضل فاكر أحلى لحظات الفرح بلقطات مهزوزة ومش واضحة وصوت مش مظبوط ومشاهد مش ظاهرين كعريس وعروسة فيها، هتحتاج تبذل مجهود وتدور وتختار مصور الفيديو اللي عارف إزاي يقدملك فيلم عن الفرح محترف وفيه النظرة الفنية اللي تعرف تلقط وتصور وتحتفظ بالتفاصيل.

 

تصوير: محمد عاطف

عندك وقت وعندك أسئلة:

خد كل الوقت اللي هتحتاجه في التدوير، بس أول ما تحدد أكتر الأسماء اللي شغلهم عجبك، هيكون عندك أسئلة محتاجة إجابة من كل شخص منهم. 

- هل عندك مساعد يكون معاك في التصوير وهيساعدك في المونتاج؟ 

- إيه نوع الكاميرا اللي بتستخدمها وإيه الأدوات اللي بتحتاجها وليه؟

- هستلم الفيديو كامل بعد قد إيه من الفرح وإزاي؟

- هل عندك تصور لشكل الفيديو وهيمشي إزاي ولا لأ؟ وشكل التصور ده إيه؟

- إيه الستايل اللي بتحبه وتفضله في التصوير؟ وممكن توريني مثال لشغلك من كل نوع أو ستايل؟

- إيه الخدمات المختلفة اللي بتقدمها وكل حاجة بتكون تكلفتها إيه؟

- هل ممكن تقدم حاجة زيادة؟ وإيه هي؟