إزاي تختاري ورد فرحك

٦ حاجات حطيهم في بالك وانتي بتختاري ورد الفرح

Large

للوهلة الأولى ممكن تفتكري إن اختيار ورد الفرح من المهام السهلة، تفصيلة صغيرة من ضمن حاجات كتيرة وكبيرة في الفرح، لكن الحقيقة عكس الكلام ده.

على قد ما الأمور بالنسبة للورد تبدو سهلة وبسيطة، على قد ما التدقيق والعناية في اختيار ورد فرحك مهم وعنصر أساسي في كل تفاصيل الفرح، بداية من بوكيه العروسة لغاية ورد الديكور.

٦ حاجات حطيهم في بالك وانتي بتختاري ورد الفرح:

١- موسم وتاريخ فرحك

فرحك في الخريف، الربيع، الصيف ولا الشتاء؟ موسم فرحك هيحدد نوع ولون الورد، أول حاجة هنعرف إيه الورود الموجودة في مصر وأنهي منهم ينفع في موسم فرحك. فيه ورود مشهورة وتقريبا موجودة طول السنة عندنا زي ال لي لي الأبيض والأزرق، التوليب، اللوتس، عباد الشمس، البابونج، الأقحوان أو زهرة الربيع، الداتورة، الدافلي، زهرة الرمان، البلادونة، الصبار والصفصاف. طبعا الكلام ده ممكن يكون هيروغليفي بالنسبالك، بس جوجل هو الصديق المناسب في الوضع ده، اكتبي أسامي الورود دي واللي يعجبك شكله سجليه علشان هينفع في خطوة لسه جاية قدام.

نيجي بقي للألوان اللي ممكن تكون أهم من نوع الوردة. لو فرحك في الخريف يبقي اختاري ألوان مبهجة زي البرتقاني، الدهبي أو البني الشوكولاتة، لكن لو في الشتاء أو الربيع، احساس الهدوء والتلج يخليكي تروحي لورود كلها بيضا مع فروع خضرا بسيطة وهتكون أنسب حاجة للوقت ده. الصيف بقى حاجة تانية مش هنتجرأ زي الخريف بس برضه بيحتاج ألوان خفيفة زي اللبني، الكريمي أو الأصفر.

٢- فرحك عامل إزاي 

الورد بيبرز شكل الفرح وبيكمله، يعني لو الفرح كبير أو رسمي شوية يبقي الاتجاه للورود التقليدية واللون الواحد في كل الديكور هيكون مناسب لفرحك. لكن لو الفرح بسيط وحابة يكون فيه إبداع أو حاجات غير تقليدية يبقي ممكن تدخلي أكتر من لون على بعض وتحطيهم بطريقة عشوائية تظهر إنه الديكور معمول بالإيد.

اختيار pinterest كصديق في المرحلة دي هو الأنسب لأنك مجرد ما هتكتبي شكل الفرح هيطلعك ترتيبات وألوان ورود كتير تقدري تختاري منها أو على الأقل هتديكي فكرة للاختيار النهائي. 

ورود الفرح من Daisy Flower

٣- مكان الفرح

تخيلي معايا كده، انتي معزلة جديد من بيت لبيت وناقص خطوة الفرش الأخيرة، مش هتروحي تبصي على البيت وتعرفي إيه ممكن يتحط فين على أساس المساحة وتصميم البيت؟! هنا هنعمل نفس الحاجة، مكان فرحك هيحدد الأشكال وترتيبات الورود اللي هتكون مالية المكان، هتبصي انتي وخطيبك وتعرفوا عايزين تعملوا الديكور فين وعلى أساسه هيتحدد عدد وشكل ورود الفرح

ورد الفرح من May Flowers

٤- بوكيه الفرح

بوكيه الفرح تقريبا زيه زي الفستان، وهتكتشفي ده يوم ما المصور يبعتلك صور فرحك. اختيار الشكل الطويل أو المدور للبوكيه موضة وأكتر حاجة مستخدمة دلوقتي، ده لو عايزة شكل درامي أو رسمي ليكي. لكن لو عايزة حاجة أبسط وغير رسمية، الشكل اللي مربوط بطريقة غير منظمة ومعمول بالإيد هو الأنسب في الحالة دي. 

بوكيه الفرح من كيني فلاور

٥- محل الورد

هنا هتدوري على الأماكن اللي ممكن تشتري منها، وهتجيبي الصور اللي اختارتيها من جوجل وpinterest، بعدين هتنزلي تشوفي أكتر من محل. أهم حاجة تختاري محل فيه اللي انتي عايزاه وصاحبه يكون شاطر وفاهم إزاي يساعدك في الاختيار وتكون أسعاره مناسبة ليكي ومواعيده مظبوطة في التوصيل.

٦- الميزانية

لو طالبة معاكي نوع وشكل ورد معين مش موجود قوي أو هتجيبيه من برا مصر، اعرفي إنه هيكون مكلف جدا. في الحالة دي هترجعي لأولويات فرحك، ولو الورد بالنسبالك أولولية، كملي في اللي انتي عايزاه، لكن لو الميزانية مش مناسبة هنا ييجي دور بياع الورد الشاطر أو اعتمادك على نفسك في التدوير على أشكال تانية. خلي دايما عندك خطة أولى وتانية للورد، علشان لو الأولى مش مناسبة ماديا تتجهي للتانية على طول من غير تضييع وقت.

في الآخر أهم حاجة تختاري الورد اللي بيعكس شخصيتك ويضيف لفرحك، لأن الورد عامل زي الصاحب اللي دمه خفيف في الشلة، عدم وجوده بيتحس بيه، ووجوده بيغير الجو تماما.