إزاي تختاري مجوهرات العروسة على شكل فاتحة الصدر فستان فرحك

Large

أهم حاجة لازم تعرفيها كويس وإنتي بتشتري مجوهرات العروسة هو إن الجمال في البساطة! تاني أهم حاجة لازم تعرفيها هي إنك لازم تشتري المجوهرات اللي تليق على فتحة صدر فستان فرحك

الخطوة الأولى والأصعب هي إنك تلاقي الفستان وبما إنك هنا دلوقتي يبقى إنتي خلاص عديتي المرحلة دي وجه وقت التفاصيل الأخيرة. خدي بالك لما بتيجي تشتري مجوهرات فرحك لازم تحطي في الاعتبار مش بس فتحة صدر الفستان لكن كمان تسريحة الشعر، الطرحة، الجزمة، الجيرب، وستايل الفستان بكل تفاصيله. 

جمعنا لك هنا أشكال فتحات صدر فساتين الفرح مع أفضل أنواع المجوهرات اللي تليق عليها.

دوري على الشكل والمجوهرات المناسبة:

فستان من غير حمالات:

• حلق كبير

ممكن تضيفي ستايل درامي شوية للوك العروسة مع فستان رقيق من غير حمالات. ما تنسيش إن الحلقان الكبيرة بتركز على الوش.

• عقد قصير

ممكن تلبسي حلق مع عقد قصير طول الرقبة تقريبا.

• عقد كبير

لازم تاخدي بالك هتلبسيه ازاي، ولو لبسيته صح هيقطع الدنيا! إتأكدي إن قماشة فستان فرحك مش مطرزة بتطريزات كبيرة، ما تلبسيش تاج أو هيدبيس كبير، البسي حلق صغير جدا، وشعرك يكون تسريحته بسيطة والأفضل يكون مرفوع. 

إقرا أكتر: 7 نصائح قبل ما تشتري جزمة الفرح لازم تعرفيهم

فاتحة صدر مقفولة:

• حلق صغير أو متوسط

الفاتحة المقفولة معناها إن أكيد فيه شغل وتطريز كتير في الفستان مكان الصدر، وبالتالي ما تلبسيش عقد سواء صغير أو كبير، الأفضل تلبسي حلق صغير أو متوسط لولي أو سوليتير. 

فستان كتف وكتف:

• حلق صغير بسيط

الفستان الكتف وكتف بيسلط الضوء على مكان الرقبة وعلشان كده بلاش تزحمي المنطقة وتلبسي عقد معاه، الأحسن تخلي الموضوع بسيط وتدي الفستان حقه والبسي حلق صغير.

فاتحة صدر Boat

• حلق أو عقد بسيط

مع شكل فتحة الصدر دي خليكي بسيطة في إختيارك، البسي عقد فيه حبة لولي أو فص سوليتر، أو ممكن من غير عقد خالص وتلبسي حلق. 

فتحة صدر مدورة:

• حلق مع العقد

تاني البساطة في إختيار مجوهرات العروسة أهم حاجة، مع فتحة الصدر المدورة ممكن تختاري طقم حلق مع سلسة ذوقهم رقيق.

• حلق متوسط

ممكن بقى تشيلي العقد خالص وتلبسي حلق أكبر شوية. أهم حاجة بلاش خالص عقد كبير مع الفاتحة دي.

فستان أوف شولدر:

• سلسة قصيرة مع حلق صغير، لو هتلبسي الإتنين يبقى خلي إختيارك بسيط جدا.

• حلق كبير

ممكن تختاري تلبسي حلق بس من غير عقد وساعتها ممكن يكون كبير شوية.

• عقد لولي

ممكن عقد بسيط من اللولي ومعاه الحلق بتاعه.