إزاي تختاري فستان فرحك؟

اللي هيتكلم عنك ويحكي حكايتك

Large

كتبت/ مروة يحيى - ياسمين بدوي

هيفضل فستان الفرح بالنسبة لأي بنت هو الفستان الأهم في حياتها، وده اللي بيخليها كل ما تشوف فستان حلو تتخيل نفسها لابساه، لكن أول ما يبدأ الحلم يتحول لحقيقة، تنسى كل ده، وتبقى مش عارفة تختار فستان فرحها إزاي.

الفستان هو اللي في الفرح بيحكي حكايتك وإحنا هنسهل عليكي مهمة الاختيار وهنقولك في١٤خطوة إزاي تلاقيه.

١- طبيعة جسمك هتحدد ستايل الفستان:

جسمك عارف إيه أكتر حاجة تناسبه، اسمعيله. والفستان المثالي هو اللي هيمشي مع طبيعة وشكل جسمك ويخفي عيوبه. فقبل ما تدوري على الموديل شوفي أقرب صور لبنات شبه تفاصيل جسمك، لابسين فستان فرح عاجبك، وجمعيهم. ده هيساعدك كتير في وقت التنفيذ وفي المحلات وأنتي بتقيسي وبتختاري. 

الفستان من تصميم  Shay's Couture

٢- الفستان مش على الموضة:

فستان فرحك عمره ما هيبقى موضة قديمة أو يكون أحلى لو شبه التريند الحالي، فستانك هيكون دايما حلو لو شبهك.

٣- الوقت المثالي لقياس الفستان:

تجنبي قد ما تقدري إنك تروحي تقيسي فساتين آخر اليوم، حاولي دايما تكون مواعيدك أول اليوم وفي النور عشان الناس اللي في المحلات يكون لسه عندها طاقة ومتحمسين يدوروا معاكي ويساعدوكي، ميكونوش هلكانين بعد يوم شغل طويل. غير طبعا إن إضاءة النهار هتساعدك تحددي درجة الأبيض والستايل ويمكن حتى تخليكي تغيري معاد فرحك من بالليل للصبح أو العكس.

٤- متبصيش في المراية:

المرايات مش هتخليكي تشوفي الفستان صح، خلي دايما معاكي كاميرا وأنتي بتقيسي وإعتمدي في الإختيار على شكل الفستان في الصورة مش في المراية. 

الفستان تصميم نيهال خليفة

٥- متزهقيش:

جربي أكبر عدد من الفساتين اللي تعجبك، متزهقيش. بس أوعي الوقت يسرقك عشان لازم يبقى عندك مساحة من الوقت تختاري فيها، وأقل حاجة 3شهور،علشان تقدري تنزلي وتتفرجي وتختاري بدون أي ضغوط. ولوهتشتري، صوري نفسك بالفستان اللي هيعجبك واكتبي اسم المحل، وده هيسهل عليكي ترجعيله تاني بسهولة.وأول ما تحسي إنك بدأتي تفقدي حماسك أو تتخنقي أو تتوتري، إمشي وسيبي المحل وابقي ارجعيله بعدين وأنت مستعدة تاني.

٦- متنسيش قَصِة الرقبة:

أكتر حاجة بتظهر في صور الفرح نص الفستان اللي فوق، وعشان كده ركزي أكتر في قصة الرقبة وشكلها على وشك. 

الفستان تصميم أحمد فايز

٧- الخطوة الأولى لوحدك، لو ده هيريحك:

مش لازم وأنتي بتاخدي فكرة عن الفساتين يبقى معاكي ناس كتير، عادي إنك تروحي لوحدك لو ده اللي هيريحك. بس متنسيش إن وقت الاختيار بتحتاجي آراء اللي بيحبوكي واللي عارفة إنهم عايزين يشوفوكي أحلى عروسة في الدنيا.

٨- تآخدي إيه وأنت بتقيسي:

وقت الشوبينج، خلي معاكي حذاء بطول الكعب اللي غالبا بيريحك وهتجيبي زيه للفرح، وكمان ملابس داخلية نفس النوع اللي هتلبسيه يومها لأن تجربة الفستان بالحاجات دي هي اللي هتعرفك إذا كان مناسب ليكي ولجسمك ومريح ولا لأ. ومتهتميش بالمقاس قوي، لأن فيه مصطلح اسمه "مقاس العروسة" اللي بيكون أكبر بنمرة أو اتنين من مقاسك العادي.

٩- الفستان شبه الفرح:

فستانك لازم يناسب باقي تفاصيل الفرح، فقبل ما تقرري شكله لازم تكوني عارفة فرحك هيكون ستايله أو موده إيه وألوانه ومكانه كمان. وهيساعدك كتير لو جبتي معاكي صور للمكان وأنت بتقيسي عشان تقدري تتخيلي المشهد على بعضه. 

تصوير Chronicle Studios

١٠- فستانك بيدور عليكي:

زي ما بتدوري على فستانك، هو كمان بيدور عليكي وهيناديكي أول ما تشوفيه. فخليكي مستعدة إنك ممكن تغيري رأيك في أي وقت، وممكن تشتري فستان فرح غير اللي كان في خيالك خالص. العرف بيقول إن لون الفستان أبيض، لكن ده مايمنعش إن لو نفسك يبقى أوف وايت ممكن برضه، وممكن تدخلي الفضي في الأبيض، اللي ليه درجات حسب لونه عالقماش. فجربي كل حاجة، الأبيض بدرجاته والسمني والسكري وحتى الفساتين الملونة، ولو بتحبي القديم دوري على جاليري أو محلات بتبيع فساتين قديمة وستايلات تسعينات ولا حتى خمسينات وروحي جربيها، يمكن واحد منهم يكون مكتوبلك. 

١١- حددي الميزانية واوصفي الفستان:

قبل ما تبدأي تدوري، حددي الميزانية اللي تقدري عليها للفستان وكمالياته وأعرفي مين مستعد يساعدك لو المبلغ كبير عليكي. وماتتخضيش،الأسعار بتتفاوت على حسب سعر القماش والموديل، والمكان الليه تفصلي فيه. بعدها، حددي لنفسك على الأقل 3 مواصفات أساسية بتوصف فستان أحلامك، زي إنه يكون ملكي، قصير، طويل، بطرحة أو من غير، مريح، واسع، ضيق وهكذا. 

١٢- متتنازليش:

متتنازليش في البند ده أبدا، فستانك لو مش هتحبيه من أول دقيقة يبقى تقوليله "لأ" عادي. خليكي صريحة وواضحة مع نفسك وفي اللي بتحبيه.