إزاي تختاري الميك آب آرتست للفرح؟

علشان لازم تفضلي مبسوطة كل ما تشوفي صور فرحك

Large

الفكرة في المكياج عمرها ما كانت شكل وخلاص، الفكرة الأساسية إنك تحسي إنك في أحلى صورة وأنت حاطة الميك آب ده وإنك دايما تفضلي مبسوطة كل ما تشوفي صور فرحك أو حد يفكرك باليوم وشكلك فيه. 

وقبل ما نقولك على الحاجات اللي تساعدك تختاري الميك آب آرتست، عايزين نقولك إنك في كل الحالات جميلة، وإن المكياج ده مجرد تفصيلة زيادة هتزود جمالك مع ضحكتك وفرحتك. 

ودي النتيجة اللي وصلنالها وإحنا بندور على إزاي تختاري الميك اب آرتست. 

ميك اّب اّرتست سها خوري

١- اعملي اللي عليكي:

تعرفي إن جسمك بيفهمك ويحس بيكي أكتر من أي حد، وبمجرد ما يحس بحبك ليه، هيوريكي إزاي هو كمان بيحبك وبسرعة جدا. ده بالظبط اللي محتاجة تعمليه من بدري، من قبل الفرح بـ8 شهور على الأقل، محتاجة تبدئي عنايتك ببشرتك. لو عايزة تروحي لدكتور، عيادة جلدية، مركز للبشرة أو دكتور تغذية يبقى لازم تبدئي من بدري. جهزي جسمك وبشرتك ليوم الفرح، لأن المكياج مش هيقدر يعمل حاجة لو أنت معملتيش اللي عليكي. 

٢- تلاقيه فين:

مش حاجة جديدة عليكي إن أغلب الاختيارات للميك آب آرتست هتلاقيها أونلاين. لكن قبل ما تبدئي تدوري على صفحات وأسماء، لازم تحددي الشكل والستايل اللي بتحبيه. عايزة الميك اب يكون تقيل ولا خفيف وهادي؟ فيه ألوان ولا ملتزم بالألوان الأساسية وبس؟ يكون فيه استخدام للكنتور ورسم الوش ولا لأ؟ دي الأسئلة اللي لازم تسأليها لنفسك قبل ما تجمعي أكبر قدر ممكن من صور العرايس اللي بيعجبك شكلهم. بعد كده، هيكون سهل تلاقي أكتر الأسماء للميك آب آرتست اللي شغلهم شبه اللي بتحبيه. ومتستهونيش بخبرات اللي قبلك، لو مبتعرفيش قوي في الميك آب، اسألي حد من أصحابك أو قرايبك لأن الترشيحات المباشرة هي أكتر حاجة تقدري تثقي فيها 100%.

ميك آب آرتست محمد عبد الحميد

٣- اتأكدي من التكاليف:

قبل ما تآخدي الخطوة اللي جاية، اتأكدي إن المبلغ اللي معاكي للمكياج ضمن تكاليف الفرح يقدر يغطي اللي اختارتيهم. وخلينا نقولك إن شكلك في الفرح حاجة مش ممكن تتنازلي عنها. اللي حلمتي بيه طول عمرك لازم يبقى حقيقة في اليوم ده، ومهما اتكلف، أكيد هيستحق.

٤- الصور أحسن من الكلام:

لما تبدئي تتواصلي مع أكتر من ميك آب آرتست، تجنبي إنك تشرحيلهم اللي أنت عايزاه، الصور دايما هتوصل اللي في دماغك أحسن من الكلام. لو متخيلة شكل معين، ستايل بعينه، جمعي الصور ووريهالهم. لو شعرك هيكون ليه قصة جديدة، لون أو تسريحة مختلفة استخدمي الصور علشان توصلي للشخص اللي تقصديه بالظبط. وريلهم كمان صور للإكسسوارات والمجوهرات اللي هتلبسيها وصور فستان الفرح. لو الميك اب آرتست قدر يشوف بنفسه اللي أنت عايزاه، هيعرف يعملك شغل زي اللي في خيالك.

ميك اّب اّرتست اّيه عبد الحميد

٥- إسألي عن الحاجات دي:

جمعنالك الأسئلة اللي محتاجة تسأليها للميك آب آرتست قبل ما تتفقي على أي حاجة. 

١. إيه أنواع المنتجات اللي بيستخدمها؟ وهل أنت مرتاحة للماركات دي؟ هل هتحتاجوا تزودوا منتج مختلف أو ماركة مجرباها وبتحبي شكلها عليكي؟ هل الشخص نفسه مستعد يغير من منتجاته ويستخدم حاجات جربتيها قبل كده وبشرتك بترتاح معاها؟

٢. هل هو مستعد يعملك أكتر من تجربة للميك آب؟ وبالنسبة للبروفة النهائية، هتكون إمتى؟ (محتاجة البروفة دي تكون بالكتير قبل ٤ أو ٥ أيام من الفرح) وإيه اللي هتحتاجي تجيبيه معاكي يوم البروفة؟

ميك اّب اّرتست دينا راشد

٣. إزاي هو هيتعامل مع مكان الفرح بتاعك؟ وإزاي هيختار الستايل والمنتجات اللي تنفع معاه؟ (المكان شيء مهم جدا وبيحدد حاجات كتير تخص المكياج بتاعك).

٤. في حالة أي طوارئ، هتكون إيه الخطة البديلة؟ (محتاجة تتأكدي إن الشخص ده عنده حلول وخطة بديلة في حالة أي طوارئ تحصل ليكي أو ليه هو شخصيا في يوم الفرح). 

٥. هل هيكون فيه عقد مكتوب بينكم؟ (دي حاجة أساسية وبتوفر عليكي كتير، متعتمديش غير على الاتفاق المكتوب لأنه هو اللي هيطمنك من ناحية المواعيد والفلوس ونوعية المنتجات اللي هيستخدمها في الميك اب بتاعك).

٦- الحاجات دي بتفرق كتير:

خلينا نقولك على كام حاجة مهمين وهيفرقوا معاكي كتير وأنت بتختاري. 

١. التقييمات: اتأكدي كويس من تقييمات الناس للشخص ده ومن تعليقاتهم على صفحته قبل ما تقرري. 

شكر لمنى جمال الميك اّب اّرتست

٢. صفحة أو موقع يكون شغال ومتفاعل: اتأكدي إن صفحة الشخص ده أو موقعه عليهم تفاعل مستمر، وإنك تقدري بسهولة تتواصلي معاه وتوصليله. 

٣. الطريقة وأسلوب التعامل: مش محتاجة أبدا تتعاملي مع شخص أسلوبه أو طريقته وحشة وخصوصا يوم فرحك. فلو مش مرتاحة لطريقة الشخص 100% معاكي، اهربي فورا. وهتلاقي حد غيره متقلقيش. 

٤. يوم للتصوير: يوم البروفة النهائية، خلي معاكي كاميرا كويسة واتصوري على قد ما تقدري. بالشكل ده، هتعرفي الميك آب هيفضل صامد معاكي وعلى حاله قد إيه وهتعرفي شكلك هيكون إيه في صور الفرح. 

ميك اّب اّرتست باسم عشوب

٥. متنسيش أنت مين: متنسيش شخصيتك الأساسية وأنت بتعملي كل ده، خلي في بالك شكلك الطبيعي في الأيام العادية علشان متبعديش عنه كتير، وخليكي متابعة إحساسك ناحية نفسك وشكلك إيه في كل مرحلة من دول. متتخليش عن شكلك اللي بتحلمي بيه ليوم فرحك، لأنه مينفعش حد يقررلك أو يختار بدالك، وخصوصا الميك آب آرتست.

 

الفكرة في المكياج عمرها ما كانت شكل وخلاص، الفكرة الأساسية إنك تحسي إنك في أحلى صورة وأنت حاطة الميك آب ده وإنك دايما تفضلي مبسوطة كل ما تشوفي صور فرحك أو حد يفكرك باليوم وشكلك فيه. 

وقبل ما نقولك على الحاجات اللي تساعدك تختاري الميك آب آرتست، عايزين نقولك إنك في كل الحالات جميلة، وإن المكياج ده مجرد تفصيلة زيادة هتزود جمالك مع ضحكتك وفرحتك. 

ودي النتيجة اللي وصلنالها وإحنا بندور على إزاي تختاري الميك اب آرتست. 

ميك اّب اّرتست سها خوري

١- اعملي اللي عليكي:

تعرفي إن جسمك بيفهمك ويحس بيكي أكتر من أي حد، وبمجرد ما يحس بحبك ليه، هيوريكي إزاي هو كمان بيحبك وبسرعة جدا. ده بالظبط اللي محتاجة تعمليه من بدري، من قبل الفرح بـ8 شهور على الأقل، محتاجة تبدئي عنايتك ببشرتك. لو عايزة تروحي لدكتور، عيادة جلدية، مركز للبشرة أو دكتور تغذية يبقى لازم تبدئي من بدري. جهزي جسمك وبشرتك ليوم الفرح، لأن المكياج مش هيقدر يعمل حاجة لو أنت معملتيش اللي عليكي. 

٢- تلاقيه فين:

مش حاجة جديدة عليكي إن أغلب الاختيارات للميك آب آرتست هتلاقيها أونلاين. لكن قبل ما تبدئي تدوري على صفحات وأسماء، لازم تحددي الشكل والستايل اللي بتحبيه. عايزة الميك اب يكون تقيل ولا خفيف وهادي؟ فيه ألوان ولا ملتزم بالألوان الأساسية وبس؟ يكون فيه استخدام للكنتور ورسم الوش ولا لأ؟ دي الأسئلة اللي لازم تسأليها لنفسك قبل ما تجمعي أكبر قدر ممكن من صور العرايس اللي بيعجبك شكلهم. بعد كده، هيكون سهل تلاقي أكتر الأسماء للميك آب آرتست اللي شغلهم شبه اللي بتحبيه. ومتستهونيش بخبرات اللي قبلك، لو مبتعرفيش قوي في الميك آب، اسألي حد من أصحابك أو قرايبك لأن الترشيحات المباشرة هي أكتر حاجة تقدري تثقي فيها 100%.

ميك آب آرتست محمد عبد الحميد

٣- اتأكدي من التكاليف:

قبل ما تآخدي الخطوة اللي جاية، اتأكدي إن المبلغ اللي معاكي للمكياج ضمن تكاليف الفرح يقدر يغطي اللي اختارتيهم. وخلينا نقولك إن شكلك في الفرح حاجة مش ممكن تتنازلي عنها. اللي حلمتي بيه طول عمرك لازم يبقى حقيقة في اليوم ده، ومهما اتكلف، أكيد هيستحق.

٤- الصور أحسن من الكلام:

لما تبدئي تتواصلي مع أكتر من ميك آب آرتست، تجنبي إنك تشرحيلهم اللي أنت عايزاه، الصور دايما هتوصل اللي في دماغك أحسن من الكلام. لو متخيلة شكل معين، ستايل بعينه، جمعي الصور ووريهالهم. لو شعرك هيكون ليه قصة جديدة، لون أو تسريحة مختلفة استخدمي الصور علشان توصلي للشخص اللي تقصديه بالظبط. وريلهم كمان صور للإكسسوارات والمجوهرات اللي هتلبسيها وصور فستان الفرح. لو الميك اب آرتست قدر يشوف بنفسه اللي أنت عايزاه، هيعرف يعملك شغل زي اللي في خيالك.

ميك اّب اّرتست اّيه عبد الحميد

٥- إسألي عن الحاجات دي:

جمعنالك الأسئلة اللي محتاجة تسأليها للميك آب آرتست قبل ما تتفقي على أي حاجة. 

١. إيه أنواع المنتجات اللي بيستخدمها؟ وهل أنت مرتاحة للماركات دي؟ هل هتحتاجوا تزودوا منتج مختلف أو ماركة مجرباها وبتحبي شكلها عليكي؟ هل الشخص نفسه مستعد يغير من منتجاته ويستخدم حاجات جربتيها قبل كده وبشرتك بترتاح معاها؟

٢. هل هو مستعد يعملك أكتر من تجربة للميك آب؟ وبالنسبة للبروفة النهائية، هتكون إمتى؟ (محتاجة البروفة دي تكون بالكتير قبل ٤ أو ٥ أيام من الفرح) وإيه اللي هتحتاجي تجيبيه معاكي يوم البروفة؟