أفلام تفتح نفسك ع الجواز

فشارك ومشروبك المفضل معاك وسيب الباقي علينا

Large

أفلام عن الحب والجواز؟ تخيلوا مشهد لرجليه وهو بيفتح باب العربية وبينزل منها، وصوت خطواته وهو ماشي ناحية الباب القديم المقفول. وقدام البوابة، وقف والمشهد وسع، وبقى باين من جوة المبنى والباب المقفول بيتفتح براحة وهو واقف قدامه ببدلة العريس مبسوط وبيضحك والليموزين راكنة في الشارع وراه. شوية، والمشهد بيتبدل، وكأن عينك كانت مقفولة وبتفتح مع الكاميرا اللي بتتحرك من جوة المبنى لبرا ناحية الباب، ناحية العريس اللي مستني قدامه ... أول خطواتك كعروسة لعريسك. 

"كااات" هي الكلمة الوحيدة اللي بترن في دماغك أول ما حد ينادي عليك في اللحظة دي، اللحظة اللي بتتخيل فيها وعايش مع الفليم للآخر ومعاك الفشار ومشروبك المفضل. في الأفلام، بنلاقي كل اللي محتاجينه وقت ما بنتفرج، بنلاقي الحب والإهتمام والونس والأحلام وساعات كمان بنحقق كل الأحلام دي. الأدوار بتتغير على حسب المود، مرة بتتخيلي نفسك العروسة أو بتشوف نفسك مكان العريس ومرة بتشوف نفسك حد من المعازيم اللي بيرقصوا في الفرح وخلاص. المشاهد الحلوة اللطيفة بتفتح نفسك ع الدنيا، بتخلق مساحة أكبر في قلبك للحب والفرح. ده بالظبط اللي هيحصلك وأنت بتتفرج على الأفلام اللي جاية، اللي بنرشحهالك عشان فيها أفراح، بس مش هنوعدك إن كلها هتكون سعيدة، بنوعدك بس إن كل فيلم من دول يكون فيه حاجة من اللي هتقابلك المرحلة اللي جاية وأنت بتجهز لفرحك وداخل على جواز. نتمنالك مشاهدة ممتعة وإن الأفلام دي تخليك متحمس أكتر للفرح واللي جاي في حياتك. 

- Runaway Bride:

بعد سنين من الهروب والجري من أفراحها، ماجي بقت معروفة باسم "العروسة الهاربة" وده اللي خلى آيك الصحفي يدور عليها عشان يكتب موضوع عن قصتها. اتفرج على الحكاية الحقيقية!

- The wedding planner:

ماري منظمة أفراح محترفة، وهتعرفك طول الفيلم على أسرار المهنة. هتلاقيها دايما البنت اللي عندها كل الحلول والإجابات الصح، بس كمان عندها أكبر غلطة في مهنتها، إنها حبت العريس. جهز نفسك لكسر القواعد!

- Bride wars:

بتتعرض صداقة العمر بين ليف وإيما لاختبار حقيقي وقوي لما الاتنين بيتخطبوا في نفس اليوم ويبدأوا يجهزوا للفرح. وأنت اللي هتشهد على الحرب بينهم!

- 27 dresses:

مكانش عند جاين مشكلة أبدا تلعب دور صاحبة العروسة في صمت ٢٧ مرة بس لما جه اليوم اللي هتلعب فيه الدور ده في فرح اللي بتحبه قررت تتكلم وتقول لأ. استعد للآكشن!

- Made of honor:

لقى توم إن الحل الوحيد قدامه إنه يكون مكان صاحبة العروسة في فرح هنا أقرب أصدقائه، لأنه اكتشف إنه بيحبها أول ما جت تبلغه بخطوبتها، وقرر يفضل جنبها وهي بترتب للفرح لحد ما يقولها. شوف لما الراجل يبقى مكان صاحبة العروسة ممكن يحصل فيه إيه!

- My best friend’s wedding:

قبل كام يوم من فرح أقرب صديق ليها، اكتشفت جوليان قد إيه بتحبه وقررت إنه لازم يعرف. استمتع بالرقصة الأخيرة!

- The proposal:

بعد ما مارجرت خلت مساعدها يتجوزها عشان تحافظ على الفيزا، اكتشف إنه بيحبها وقرر إنه لازم يرجع يتقدملها ويخطبها بشكل رسمي. إنك تكون المدير حاجة ليها فوائدها برضه، مش كده ولا إيه؟!

- Mamma Mia!:

صوفي هي العروسة اللي بترتب لفرحها وبدأت تعزم الناس بس عشان تقابل أبوها الحقيقي لأول مرة. متبطلش غُنا!

- Father of the bride I:

جورج عمره ما فكر إن اليوم ده هييجي بسرعة كده، يوم فرح بنته بيقرب وهو بيرتب معاها كل حاجة بس لسه مش قادر يتقبل فكرة بُعدها عنه. هتشوف أحلى لحظات الحب الصافي في أحلى الأفلام عن الحب والجواز، عشان البنت حبيبة أبوها!

- Rachel getting married:

كيم راجعة تاني البيت بعد فترة طويلة من العلاج عشان تحضر فرح أختها، اللي فيه هيواجهوا بعض بالحقيقة اللي هتقربهم زي زمان. مشاهدة ممتعة!

- The wedding ringer:

جيمي هو الشخص اللي أي عريس يقدر يوظفه لو واجه مشكلة، بس دووج عريس خجول جدا وملهوش أي أصحاب وبيحط جيمي في أصعب تحدي عدى عليه قبل الفرح بأسبوعين بس. استعد للأفراح الكتير!

- I love you, man:

بيكتشف بيتر إن عمره ما كان عنده صديق مقرب بعد ما بيتقدم لحبيبته. ووقت التجهيز للفرح، كان هو مشغول بالتدوير على صديق لنفسه. ملحوظة: الأصدقاء حاجة أساسية للفرح.

- P.S. I love you:

اكتشفت هولي إن جوزها المتوفي بقى أقرب ليها بعشر رسايل سابهم قبل ما يموت، واللي من خلالهم حبت نفسها واتغلبت على وجعها وحبته هو أكتر. نتمنالك مشاهدة مثاليه!